Mokokchung-Mariani National Highway indang metetdaktsür

Dimapur, June 20 (TYO): June 13, 2017 nü NH702(D) anasa aliba yimtsüng 14 den sorkar tenüng nung ketdangsertem, contractor aser ali kiburtem külem senden ka amen.
Senden nung bangdak ketdangsertemi agizükba ama contractor-i material tajung amshia lenmang yanglutsü aser bangdak department nungi technical officers-i mapa ketdangsüa reprangtsü telemtetba agi, ta Convener Imchawati Kichu aser Secretary Toshimeren nati sangdong ka nung metetdaktsü.
Senden nungsa sorkar contractor tem dang nungi royalty memeshitsü atema ali kibur yimtsüng 14-i lemtet. Gari lenmang jungjunga yanglutsü mechi nung aser senso ajak ajangzüktsü atema ali kiburtemi royalty magitsü lemtet.
Maneni, tanga teloktem aser talisa telungpur teloktemi ali kiburtem ama contractor tem dang nungi saru kecha mesarutsü metetdaktsür, ta parnokisa metetdaktsü.
Ano, All Ward Union Mokokchung Town (AWUM)-ia tanga sangdong ka nung Mokokchung, Tuensang aser Zuneboto atema tongti lenmang Mokokchung Mariani National High way 702 -D yanglutsü ta angazükogo aser iba nung AWUM-i akokba lenmang ajak agi yariteptsü, ta metetdaktsü.
AWUM-i iba mapa nung contractor den yariteptsü aser contractor-ia lateta aliba ama mapa jungjunga inyaktsüla ta sangdong nungsa shia lir.
Maneni ali kiburtem, linük tenzükertem aser kijatemi iba mapa nung yariteptsü aser telok mesüra kija, shingaia iba mapatong nung tetsükdaktsü mesüra timtem magütsütsü mepishia metetdaktsür, ta AWUM tir R. Ayim Longkumer aser tongti tezülur Lanumeren nati sangdong nung metetdaktsü.