Mokokchung mountain bike festival 2.0 tenzükogo

MTBA Pastor, Rev. Ponen Longchar-i Trail Hounds Cycling Club-i ayongba Mokokchung Mountainb Bike Festival 2.0 tenzüktsüdang tangokba noksa nung angur. Mokokchung, Dec 7, 2017.

Mokokchung, Dec 7 (TYO): Mokokchung nung aliba Trail Hounds Cycling Club-i ayongzükba “Mokokchung Mountain Bike Festival 2.0” Brihostibarnep Mokokchung Town Baptist Arogo (MTBA), Pastor, Rev. Ponen Longchar-i sarasadema tenzüktsüogo.
Anogo ananü benjong akaba mapangji tetoktepba tapu ana alitsü; kaji ‘Mokokchung Cross Country (XC)’ aser kaji ‘Mokokchung Xtreme Downhill (DH) Challenge’. Osang tajung kaji; taküm iba tetoktepba ana nungji Nagaland nungi dang masü saka Manipur, Sikkim, Assam, Meghalaya, Maharashtra, Himachal Pradesh aser ano Nepal linük nungi densema Cyclist ajak agi 25 tashi arua shilem agidaki.
Brihostibarnep iba benjong tenzükba den Mokokchung Cross Country (XC) tetoktepba ka Mokokchung Town Square nung MTBA Pastor Rev. Ponen Longchar-i sarasadema flag off sütsü. Iba Cross Country (XC) tetoktepba nung nisung 25-i shilem agi aser ibai Yimchalu yim süngküm nung tembanga liasü.
Tanü Cross Country tetoktepba nung Expert Category nung Himal Tamata (Nepal), Okesh (Nepal) aser Deepak (Nepal) par asemi mezüng, tanabuba aser tasembuba jenjang angu. Under 17 category nung; Akümdong, Pontiang aser Jongshimar parnoki takok angu. Iba tetoktepba nung tetsür cyclist (Merensangla) kati shilem agia liasü.
Dec 8 nüji ‘Mokokchung Xtreme DH Challege’ tetoktepbaji Chuchuyimpang Downhill Track; Orange Farm nung agitsü. Iba benjong shibangba aser senpet agütsüba sentong nung Mokokchung Deputy Commisisoner Sachin Jaiswal tongti tesemdanger aser World Tour Cyclist & Entrepreneur, Yakuza Solo tetushi tesemdanger asütsü jaoka lir. Sentong nung Cyclist Pranab (Marin Bikes India); Ollie Hemstock (Summit United Kingdom); Bolto (Team Native Station Kohima); Kaolim (Team XTB Kohima) parnokia shilem agitsü ta osang ajanga angazüker.
Iba sentong ya tongtibangsa asen lima rali-walir puadaktsütsü, rongsenkettsüng renloktsü, cycling nüngtugu kümdaktsüba den anema aliba ajungshitsü nükjidong yur ayongzükba lir, ta Trail Hounds Cycling Club tir, Atoba Longkumer-i iba osangbener den jembidang ashi.
Iba sentong reprangtsüba atema taa kecha magir, anungji, tejangrar ajak arua reprangtsü asoshi Trail Hounds Cycling Club ketdangsürtemi ayongzüka metetdaktsü.