Mokokchung Municipal Council-i metetdaktsür

Dimapur, November 16 (TYO) : Khristmas aser Küm Tasen benjung amungtsü aliba nung ajemdaker Mokokchung Municipal telongtet nung shishilembartemi pei dokan, kiojen aser temeket merükmejua ayutsü metetdaktsür, ta ADC aser Mokokchung Municipal Council Administrator, Bendanglila-i sangdong ka nung metetdaktsü.
June 4, 2016 nü tetuyuba agütsüba ama, aonung dokan kima yabangtsü atema CFL amshitsü aser jana endoktsü atema dokan kima Waste Box (USE ME BOX) ka ka ayutsüla, ta Bendanglila-isa shisem.
Maneni, Mokokchung Municipal telongtet nung club/Society/association/organization amalai dokantem dang ticket, lottery aser calendar tem ayoktsü memelar, ta laisa sangdong nung metetdaktsü.