Mokokchung nung AKM census card mita ao

Mokokchung, August 7 (TYO): August 7 nü Ao Kaketshir Mungdang (AKM)-i Mokokchung Municipal kübok ward 18 nung AKM census card ali mali mita aoba mapang, AKM census card aser IPL kaket shitak malirtem noklang dak tali puteta liasü, ta AKM tatong tir, Sp. Sünglem Walling-i AKM office nung osangbenertem den jembidang metetdaktsü.
AKM-i iba maparen ya 2007 küm “Survival Mokokchung” ta sür yimyim ayima liso nisungtem bendanger nungi lenla balala nungi kümzüka ayutsü nükla yur tenzükba joko taküm agi küm 13 shi inyaka arur, ta paisa ashi.
Tanü ajungbena AKM census card shitak ali mali mita aoba mapang nisung aika ket nung ILP junga maliba, mapang süir renew mesüi aliba aser AKM census card malirtem aika putet aser parnok rongnung karbo kaket kecha malirtema densema liasü, ta paisa shisem.
AKM-i iba maparen ya district administration aser police den angatetteper inyaka arur, yamaji tanü ajungbena mita aoba mapa indang yaa Mokokchung D.C aser S.P nema osang agütsüogo, ta AKM ketdangpurisa jangjashitsü.
Bendanger ozüng alema asen limai aruba tebilemtsü ya ulura aser ibai AKM-i inyakba agi dangbo alizüng metongtettsü, anungji, ibai süoki ia arok khuret ta angateta nübur ajaki AKM den amalitepdaktsünür, ta AKM ketdangpurtemisa tayongzükba olen ka agütsü.