Mokokchung nung anogo pungunü CFR training agi

Alima lendong balala arudang nüburtemi mezüng langzüba dak sentakba nung shisatokden sentong ka Oct 24-28 tashi Town Hall Mokokchung nung takok ngua agir külen, shilem agirtem den tayongertem külemi tangokba noksa nung angur. (Mokokchung, October 28, 2016)

Mokokchung, Oct 28 (TYO): Alima lendong balala arudang nüburtemi mezüng langzüba dak sentakba nung ‘Community First Responder’ ta sür Training of Trainers (ToTs)-tem atema shisatokden sentong tajung ka Oct 24 nungi tenzüka anogo pungunü yangi Mokokchung Town hall nung takok ngua agiogo.
Iba sentong nung Mokokchung Head Quarters densema sub-division tenet (7) nungi teshimtet nübu 35 arua shilem tajung agia aden. Iba training nung adenertem nem District Disaster Management Authority Mokokchung ajanga ToTs kuli kaket agütsüogo.
Iba sentong ya Nagaland State Disaster Management Authority (NSDMA)-i nungita Civil Defense & Home Guards, Health &Family Welfare aser State Disaster Response Force (SDRF) den yaritepa District Disaster Management Authority Mokokchung-i ayongzükba lir.
Sentong nung shisalen sayurtemji; District Disaster Management Officer (Tuensang & Mokokchung), T.Wangshi Jamir; SDO Civil Mokokchung Sachin Jaswal IAS, Medical Officer ART Mokokchung Dr. Temsümenla Longkumer liasü. Iba den ano inyaka sayuba (practical maparen) nung HG&CD aser SDRF nungi jawan-temi yaritepa liasü.
Tanü iba shisatokden tatembang sentong nung tetushi tejaoker, Mokokchung SDO Civil, T.Lemlilai jembidang, iba training nung adenertem ya kanga tongtibang nisungtem lir, kechiyong nenok ya nübur nem alima lendong balala nungi kümzüka alitsü sayutsü pur lir, ta ashi.
Tangar ka kümzüktsü asoshi mezüngbuba pei kümzüka alitsüla, aser pei kümzüka alitsü asoshi tasa balala angazükba ajanga dang sütettsü, anungji, tasa angazüktsübaji kanga tongtibang lir, ta laisa ashi. Kümzükba aser lendong matalokdang saksalema aser kümdangshia alitsüba kanga nüngdaker, ta laisa shisem.
Kasa sentong nung DDMA züngsem Er. Yanger Pongenia mapang tatsüka agia jembidang, training nung dener certificate angubaji tongtibangba masü, saka angazükbatemji nai koma khuret süa amshir ta asübaji tongtibangba lir, ta ashi.
Nübur taküm aika nenok ket nung lir, anungji, nenoki iba khuretji agizüktsüla aser training nung angazükbatemji akok tashi nüburtem dang sayutsü pai ajungshia liasü. Lendong atalokba mapang nenoki nübur kümzükba maparen nung shilem tulu agitsü imlar, ta paisa shisem.
Anogo pungu sentong nungji alima lendong balala atalokba mapang koma langzütsü ta asüba onük balala nung ajemdaker shisalen sayurtemi tesayuba den mapa dena ia sayua liasü. Iba den ano sentong nung adenertem telok balala küm lemsar tetoktepbatem liasü.