Mokokchung nung bank asem shibangtsüogo

Dimapur, December 20 (TYO): PMEGP kübok loan agütsütsü asoshi mapang latettsüba nung magütsüba atema tejashi sayua PMEGP beneficiaries 2014-17-i Bodbarnü Mokokchung nung Axis, ICICI aser HDFC bank tem shibangtsüogo.
Ao Senden, Watsü Mungdang, AKM aser MTLT temi pusema PMEGP 2014-17 loan tangutsüpurtemi bank tem shibangtsü.
2014 nungi tenzüka District Level Task Committee-i PMEGP loan applications nungi nisungtem shimtetba liasü.
December 14, 2017 nü District Administration, beneficiaries, Ao Senden, Watsü Mungdang, AKM, MTLT tem külem senden ka amendang December 20, 2017 tashi nung loan agütsütsü atema anogo latettsü.
Ajisüaka, latettsüba anogo süiba aser ano bank asem nungi kecha telangzüba maliba atema PMEGP teyari angutsüpurtem den tongti telok nungi teshimtet lennirtemi tanü Mokokchung Deputy Commissioner den ajurutepa bank tem dang mepelaba osang metetdaktsü.
Mokokchung nung bank asemi telangzüba tajung magütsü tashi aser PMEGP kübok loan angutsüpur nem temeten magütsü tashi melapokdaktsütsü ta PMEGP Beneficiary kati osangbener dang ashi.
Ano külen, bank staff kati ashiba agi parnoki iba khuret ya Central Office den lemsatepogo, ajisüaka PMEGP kübok loan agütsütsübaji central office ajanga lemtetba ama dang inyaktsü, ta ashi.
Tanü bank tem shibangba ajanga nisungtemi timtem ajuruogo aser benjung mongpu mapang bank tem shibangba ajanga customers aser business nisungtemi tetsükdaktsü ajurutsü akok.
PMEGP kübok loan angutsüpur parnok 30 shi ka teinyaktsü aser training ajak tembangaka tanü tashi loan mangu lir. Parnok teimbaka zünger mapa mangurtem aser start-up entrepreneur tem lir.