Mokokchung nung city bus service tenzükogo

Mokokchung, JAN 26 (TYO): Jan 26 nü Minister for Transport, Civil Aviation, Railways & Land Resources Government of Nagaland, P. Paiwang Konyak-i Mokokchung NST station nung sentong ka agia Mokokchung city bus service tenzüktsüogo.
Mokokchung city bus service atema department-i nisung 35 mentetba bus asem (3) agütsüogo. Item bus-tem ya Deobar dak alaka Hombar nungi Honibar tashi anepdang 6:00 ako nungi aonung 6:00 ako tashi service agütsütsü. Nüburtemi metettsüba kaji; iba bus nung amenba bus para-ji kilometer 2 tashi amenba nung senpak 5/-, kilometer 5 tashi nung senpak 10/- aser kilometer 10 tashi amenba nung senpak 15/- dang agitsü, ta metetdaktsüogo.
Mokokchung Town Baptist Arogo, Associate Pastor, Rev. Chuba-i Mokokchung city bus service atema temoatsü meshia aser meshitetba sarasadem agi. Sentong nung Mokokchung Deputy Commissioner, Rajesh Soundararajan (IAS), Ao Senden tir Chubawati Longchar, NST General Manager O. Elhibemo Yanthan parnokia mapang tatsütsü agia tepela o den tayongzükba o balala lemsatep.
Sentong temer külen Minister P. Paiwang Konyak-i osangbener senden ka nung jembidang, Mokokchung nung city bus service tenzüktsüba ya yaküm küm pai nangzükba mapa ka lir aser ibai Christmas matongdang tenzüktsü ta bilem, saka koda masüba sorkar maparen kar ajanga tang ang asangsang mapa akümer aser “ibai NST meyong masü saka Mokokchung nübur meyong ama bilema anepaludaktsünür”, ta ashi.
Mokokchung nung iba service tenzükba ajanga “tantsür-tambur, lemtamatar, kaketshirtem aser nübur lenla balala nung tajangzük angutsü imlar; junga bener aotsübaji nüburtem dak dang tuluka keta lir, anungji, nüburtemi ibai tamshi shia amshitsüla”, ta pai ashi. Iba service ya Mokokchung nung junga ao nungbo tanga district-tem nunga tenzüka aotsü tebilemba lir, ta paisa shisem.
Iba dak sentakba nung service junga magütsüra mesüra NST department ketdangsür aser staff-temi tim masüba mapa kar danga inyakra, pa nem osang agütsütsü asoshi paisa ashi. Paisa inyakdaktsünüba olen ka lemsatepdang, “mapang shia nüburtemi khuret bena iba service junga aor asü maor mita reprangdaktsünür”, ta shia liasü.
Paisa Mokokchung nung aliba Inter State Bus Terminus (ISBT) mapa meinyakba atema jangjashitsüdang, department-ibo kechi teinyaktsü tim liasü ajak inyakogo, saka nüburtemi mamshiba dang lir, anungji, ibai junga bener aotsüjibo joko nüburtem dak dang keta lir, ta ashi.
Iba osangbeneri Minister Paiwang dang, tarutsü nung par department-i inyaka aotsüba mapatong kar lemsateptsü asüngdangdang, ali shitak angu nungbo Mokokchung nung helicopter anendak helipad ka yakta yanglutsütsü bilemdar, ta ashi. Iba den ano central sentong kübok district shia nung sub-division densema helipad anendak yanglutsü aser iba ajanga state nung helicopter service tajungba ajungkettsütsü imlar, ta paisa shisem.
Iba osangbenerisa, “Naia tang NST-i service agütsüba nung temulung asür masür?”, ta metetnüa asüngdangdang, lenmang kar nungbo metokmeperi alitsüa akok, aji saka, tang tashi nung department-i nüburtem atema nungdakbatem akok tashi agütsütsü merangdar, talisa NST bus ajanga tezülen alirtembo kanga ajangzükdaki, kechiyong parnokbo NST bus dak alaka tanga service kangabo mali, ta tatishitsü tesem kar bener arua ashi. Iba den ano tang department nung lanur tajung aika atudar, anungji, NST service-ji tajungba renloka aotsü imlar, ta paisa metenloktsü.