Mokokchung nung consultative senden ka menogo

Dimapur, Rongjui/September 23 (TYO): Tang teyangludak aliba Imkongliba Memorial District Hospital (IMDH) Mokokchung dak sendakba nung consultative senden ka September 21 nü ADC Planning Conference Hall nung menogo. Iba senden ya DC Mokokchung, Rajesh Soundararajan, IAS lenisüba kübok agi.
IMDH koda tongtibang, iba indang jembidang Rajesh-i ashiba agi, IMDH ya Mokokchung district atema dang masü saka kidanger district tem atemaa kanga tongtibang lir, anungji contractor tem dang maparen takaratiba nung tembang inyaktsü mepeshi. DC-isa mapa kechi südir süaka tajungtiba nung inyaktsüla ta ashi.
Director Health & Family Welfare Department, Dr. Vigolie Z. Suokhrie-i ashiba agi, par Department-i iba project kanga junga asadangdar aser project takaratiba nung tembang inyaktsü asoshi teyari agütsütsü nangzük. Senden nungsa Dr. Medem, MS IMDH-i, inyakyimtem osang agütsü aser ashiba agi, mozüki yanglushitsü atema tesadangkabo azüngteta benogo.
Kasa mapang nung Ao Senden tir Chubawati-ia mapa kechi südir süaka tajungtiba nung inyaktsüla aser iba mapa asoshi aruba sen tangalen mamshitsüla ta ashi. Pai ashiba agi, Mokokchung nung aliba lokti tentet balalai IMDH yangluba nung teyari agütsütsü renema lir. Tatem nung DC-i mapa matem tashi ita trok nung khenbosa senden amentsü benokdang.
Iba senden nung Additional Director, Health & Family Welfare Department, CMO Mokokchung, EE Medical department, SDO (C) Mokokchung, AKM President, NHP, aser contractor tem dena liasü, ta DPRO Mokokchung sangdong ka ajanga metetdaktsü.

You must be logged in to post a comment Login