Mokokchung nung COVID-19 Task Force pur senden amen

Dimapur, Metsüremi/March 13 (TYO): Mokokchung District Task Force for Novel Corona Virus (Covid-19) senden ka ADC Planning indang Conference Hall, Mokokchung nung March 12, 2020 nü senden ka mena district nung iba tashidak nungi kümzüka alitsü asoshi sentongtem yanglua liasü.
ADC Mokokchung, W. Manpai Phom mendenpuba sür agiba senden nung, tang tashinung state tesem kecha nunga COVID-19 tashidak putetba osang mali, saka asen district nung iba tashidak menatepba nungi ajema kümdaktsütsü mechi jelia renemshia alitsü nüngdanger, ta pai ashi.
Senden nung Task Force züngsemtemi iba tashidak nokdangtsü asoshi mera balala agitsü indang o lemtepa liasü aser district-i aitba tesem nung linük tesem balala nungi arurtem osang tejangja asadangtsü lemtet.
District kübok tesem balala nung hopta shia bazaar amenba ajunga nokdanga atatsü iba senden nung lemtet, kechiaser shishilembar timba kidanger state nungi ang arur.
Parnokisa nüburtemi amshiba tesem nung poster campaign tenzüktsü aser tekülem sentep nung iba tashidak indang awareness prokshitsü jembia liasü.
Mokokchung district kübok kaketshirtem nem iba tashidak nungi jenbua alitsü metetdaktsütsü mechi Mokokchung nung tang NISHTHA training tagidak aliba tesayurtem nema iba tashidak nungi kümzüka alitsü asoshi tongtibang tesayubatem agütsütsü parnoki lemtet.
Maneni iba tashidak nungi jenbua alitsü mechi dokan kibur aser shishilembar ajungai face mask inoktsü kasa senden nung lemteta liasü.
Entry point nung senzüsembonger temang tendangba mapang amshitsü asoshi sorkar dang Thermal Sensory equipment tem meshitsü asoshi Task Force ajanga telemtetba agi. District nung iba tashidak putetertem tesem balaka nung anitena anepaluba nung amshitsü asoshi quarantine centre tetemjen tesem ka bushitettsü atema sub-committee ka iba senden nung shima liasü.