Mokokchung nung DAP tem atema Cure Foundation lapok

Dimapur, June 28 (TYO) : June 28, 2016 nü Aongza Ward, Mokokchung nung Cure Foundation ta ser shi aser tekolok agi tangar memenepertem atema centre ka lapokogo.
Iba sentong nung Mokokchung Deputy Commissioner, Sushil Kumar Patel, IAS-i o jembidang, “Iba ama mapa tajung ya nisung ajaki teyari agüja nungittsüla kechiyong loktiliba nung differently abled persons (DAP) bendanga amshir aser iba jagi parnok balaka anepalutsüla” ta ashi.
Sushil Kumar-isa, differently abled persons (DAP)-i tejakleni arua register asütsü atema ayongzük. Parnok register asüba ajanga sorkari nüngdakba teyari agütsütettsü ta paisa shisem.
Tanü sentong nung ABAM Executive Secretary, Rev. Dr. Mar Atsungchanger-i Cure Foundation meshiteta sarasademtsü. ABAM-i iba Foundation yaritsü ta paisa metetdaktsü.
Cure Foundation Founder, Akangnungba-i o jembidang, DAP temji loktiliba nung jenjang teküpokba nung alir aser iba jagi parnok ajungkettsü atema Cure Foundation tentet, ta metetdaktsü.
Tanü sentong nungsa Creative Special Children nungi Prime Minister’s Award angur arishi küm 9 tain, Katibenla Kichu-i ken ka aten, Disabled Parents Association president, Mokokchung aser Aongza Ward Council-i o tatsütsü jembi.