Mokokchung nung District Task Force senden amen

Mokokchung, April 28 (TYO): April 28, 2017 nü Mokokchung Deputy Commissioner office nung Mission Indradhanush atema District task force senden amen aser weekly iron folic acid (WIFS) supplement sentong agia liasü.
Iba senden nung District Administrations, Medical department, social welfare department aser School Education Department nungi ketdangsertem aden.
Iba senden ta Mokokchung ADC, Bendanglila leniba nung agia liasü.
Okila jembidang DPO (UIP&RCH), Dr. Temsuyanger-i Mission Indhradhanush aser iba indang mission tenzükba metetdaktsüdang, iba mission ya immunization ulushitsü aser nokdangtetba tashidaktem atema vaccine magi aliba tanurtem ajak ayimjemtsü atema lir, ta metetdaktsü.
Iba mission ajanga ajak ayimjemtsü asoshi Education department aser Social Welfare Department-i parnok dang item teyari agitsü ajungshstsüla, ta paisa metetdaktsü.
DPO-isa WIFS indang metetdakja, iba nükjidong ya, joko tanur tebok nung amungtsü/abentsü mapang tonger alir tetsürtem dak anemia tashidak nokdangtsü atema arishi küm 10 nungi 19 tsüngda alir tetsürtem dak rangloker inyaker, ta metetdaktsü.
WIFS programme kübok item tetsürtem nem IFA supplements angati lemtsütsü.
Paisa Rashtriya bal swasthya karyakram (RBSK) programme indanga tongmelang agi metetdakja liasü.
Pai ashiba agi, school health programme kübok tanurtem atema Health screening agiba ya mapatong ka lir.
Tangbo iba ya ajanga tanur kinü nungi arishi küm 19 tanurtem ajak ayimjemer. Mobile health teams aser team shia sorkar aser sorkari yanriba school tem nung kaketshirtem aser Anganwadi tanurtem atema health screening agitsür, ta paisa shisem.
RBSK ya kanga junga shisatetba mapatong ka lira se iba ya ajanga tanur kinü nungi arishi küm 19 tsüngdapur dak tanur asodang, tashidak, deficiency aser matamabensaba screening agitsür, ta apisa metetdaktsü.