Mokokchung nung dokan mitba aitsür: MCCI

Dimapur, Mongputeni (October) 31 (TYO): Bodbarnep Mokokchung jila nung mejangjaba nisung kari dokan ka mita ao aser iba dokan nung kombol 10 bener ao. Iba tatalokba ajanga Mokokchung nung shishilembartemi tetsübu tia ka ajuruogo aser tiptema meliteter, ta Mokokchung Chamber of Commerce & Industry (DCCI)-i metetdaktsü.
Iba inyakyim ya shishilembartem anema tashiyim mapa ka ta MCCI-i züngshir. MCCI indang Executive Council-i iba tatalokba atema süoki ia olemtep aser taruba ghonda 48 tsüngda ozüng amertemi aibelenertem pua tepuokdak meyura, Mokokchung jila nung dokan aser shishilembadak ajak mapang telatet makai shibangtsü telemtetba agiogo, ta MCCI President Tsukti Longkumer aser General Secretary Limalenden Longkumer nati sangdong ka nung ashi.
Iba dak sendakba nung November 1, 2018 nikongtsütsü 4:00 ako nung MCCI executive council-i Mokokchung jila nung MCCI kübok aliba trade union ajak den senden ka amentsü.
Iba senden nung trade union shiai züngsem pungugu yoktsü metetdaktsür aser senden nung madenba trade union atema MCCI-i khuret kecha mabentsü, ta mendenpurtemisa metetdaktsü.