Mokokchung nung DPDB senden amen

Mokokchung, September 07 (TYO): Mokokchung District Planning and Development Board senden September 7 nü ADC (Planning) Conference hall nung kaogo, ta tanü ketdangsertem sangdong ka ajanga metetdaktsü.

Iba senden ya Mokokchung Deputy Commissioner aser DPDB Vice Chairman, Sushil Kumar Patel lenisüba nung amen.

Administrative aser officer tem shirnok district nung school achaayangtsü asoshi lemzükja lir parnoki pei tata school tem nung reprangtetbatem senden benoka jembi.

Parnok ajaki reprangtetba kaji, school tem achaayangba maparen kanga takok ngua odar, ajisüaka ketdangsertemi ashiba agi, school kitem yanglushitsü nüngdaker aser item rongnung school karbo tangsa rongdak süa tekaratiba nung yanglushitsü nüngdaker.

 School züngtur anenertem tajemba kümdaktsütsüba, mid-day meal inyakyim shidak inyaktsü, school nung metsümeshidak kanga junga anepalutsü, tajemtsü tzü tajung agütsütsü aser tesayur, tsürabur aser kaketshirtem tsüngda tesendaktep junga yanglushitsü maparen dak sendakba nung parnoki meranga inyakdangbatem ketdangsertemi metetdaktsü.

School tem lenla ajak ajungkettsü nükjidong nung, Administrative aser ketdangsertemi government school tem kaka lemsar achaayangba sentong ya DC, Sushil Kumar Patel-i achaayanga tenzükba sentong ka lir.

Iba sülen senden nung onük balala asadanga jembishinüa liasü.

Onoktem asadangba sülen board-i Baptist School, Longmisa recognize asütsü atema, Greenwood Kinder Garden School, Alichen nüngja Greenwood High School ta melenshitsü atema, Mokokchung Truck Driver’s Association Register asütsüba aser Chuchuyimlang (Green Hills Academy) nung primary school tasen ka lapoktsü atema agizükogo.

Maneni Lala Welfare Society, Sungratsü register asütsü, Mokokchung District Badminton Association register asütsü aserRajeshwari Karuna School, Tuli Middle School jenjangi ajungkettsü agizüka mapa küma inyaka aotsü atema iba dak sendakba department nem bendanga agütsüogo.