Mokokchung nung Dr. Benny Prasad den sensaksem

Mokokchung, Oct 14: Nagaland nung sempet aketer jenti lir, aji saka, item sempettemji timi mamshir, ta Dr. Benny Prasad-i metetdaktsü. Iba o ya tawa pai Mokokchung semdangba mapang iba osangbeneri maongka agia pa den sensaksemdang ashiba o lir.
Yangi alirtemi ‘competitive exam’ aser sorkar mapa balala bushiba nung dang temulung agütsür, iba jagi nisung aikati pei dak aketba sempet menguteter/memeteter”, ta paisa ashi.
“Tsüngremi nisung shia nem sempet balala moaja lir, anungji, pei sempet ngutettsü merangtsüla aser peii kechi jangrar ibaji inyakang” ta, paisa inyakdaktsünüba o ka ashi. “Rongsen kisüng atema dangbo mebilemtsüla saka takümji rongsen dang taoba”, ta paisa ashi.
Dr. Benny ya kongki awar India nunger nüngtugu instrumental solo guitarist ka lir. Pa ya arishi küm 19 asüdang ang kongki awa tenzük. “Asenoki dang jangra inyakra kecha temenu mali”, ta paisa kuli kar densema ashi.
“Yangi alir kar dak alaka degree angutsü atema dang teimba azünger, saka nisung aika mezüngnüseta azünger. Anungji nai meinyaknüba ka kechiba yamai kangshia inyaker?” ta paisa asüngdanga ashi.
“Tsüraburtemia pei chirnurtemi mejangraba nung kangabo mekangshitsüla”, ta paisa tekümdangtsü olen ka ashi. “Nisung shiai pei dak tamang akatsüla aser Tsüngremer nükjidong angateta pei jangraba inyaktsüla”, ta paisa ashi.
“Naga nunger lanur dang tayongzükba o kar ashitsü ali asü?” ta asüngdangdang, “Nükjidong tejangja yur pei tejangraba nung Tsüngrem tiyongtsü südaktsütsüla” ta ashi.
“Tsüngrem taochi agi ni kümzük, Pai ni kümzükba indang ni alima dang meshii melitet nung, ni aolen ajak ni Pa kuli asür”, ta paisa tasü ita ashi.
Iba osangbenerisa pa dang “Nagaland nung nai reprangtetba aser inyakdaktsünüba kar lir mali?”, ta metetnüa asüngdangdang, “Nagaland ya tobur tajung lima ka lir, aji saka, yangi gari lenmang kanga tepezük, iba den ano reju balala sema aoba mapang rejutem nungji nüngdakbatem aika mangur, anungji, arogo-temi iba nungji shilem agidaktsüner”, ta ashi.
“Arogotemi ki tulu yangluba nung dang temulung magütsüi nübur asoshia inyaktsüla” ta paisa ashi. “Yisui mapa agi inyaka sayu, anungji, Christian purji “practical” asütsüla”, ta paisa shisem.
“Ni kongki awatsüba ya nisung shinga nungia tajungshiba mangu, saka ya Tsüngrem nungi anguba lir, Pai kü taküm rangben melenshitsü, anungji, tanü ni kechi jenjang nung lir, itemji Pa ajanga dang asünung konang nüngsang ajak Pa nem agütsür”, ta paisa ashi.
2002 nungi pai alima tesem balala sema Tsüngrem kuli asüba den pa sempet ajanga Pa tenüng sanga jajar. 2014 küm alima tesem balala sema jajadang anogo 365 nung pai sentong balala 459 nung shilem agi aser item rongnung sentong tulu densema lir. Pa ya alima nung mapang tatsütiba agia linük aika sema jajaba world record ka yanglua lir. Pai tang tashi nung linük 260 semogo. Pai Bentar ta ser bongo guitar ka purateta lir.
Pai Oct 10 aser 11 anogo ananü Mokokchung semdangba mapang School, College, institution aser arogo balala semdanga item nungji Tsüngrem kuli asüba den angati concert agütsü. Tang Mokokchungi aruba ya zünga pai Nagaland asemben semdanger asütsü. Ano taruba November ita 6 nüji Kohima yimtibai arua concert ka nung shilem agitsü ta angazüker.