Mkg. July 12 (TYO) : Mokokchung town nung telok ka tenüng agi Hindustan Organisation ( Mokokchung Franchisee) ta ser arua lir aser iba telok yagi LPG akartem dang parnok den register asütsüla ta ashir aser yamaji meinyakra senchi sen Rs.2000 achitsü ta kar dangbo ashir saka parnoki iba atema metetdaktsüba kaketbo mesayutetter ta Mokokchung Town Lanur Telongjemi metetdaktsüogo.
Tanü Mongolbar nü Mokokchung Municipal Council nung Administrator nem agütsüba shidi ka nung lanurtemisa ashiba agi, parnoki Hindustan Organisation (Mokokchung Franchisee) nung Manager ajurua pa dang item ajakji asüngdangogo saka paia tezüluba nung parnok nem inyaktsü nungloktsüba shidi kecha mesayutet ta metetdaktsü.
Iba telok ya ita anasemka jakdang Mokokchung nung aruagi amenok aser iba head office ya 110/20, Selimpur Rd, Dhakuria, Selimpur, Kolkata, West Bengal 700031 nung ali ama sayua lir saka iba office nungi parnok nem inyaktsü nungloktsüba shidi kata mesayutet ta lanurtemisa metetdaktsü.
Ano, parnok nem MMC-i temelaba agütsüba permit nung ki sema aotsü shia mali saka sales executives 8 tashi ki sema nisungtem ashiokja senzüdaktsür, anungji item mapatemji tekaratiba nung jangjashir tapet mapa inyakdaktsüner ta MTLT telokisa MMC dang metetdaktsüogo.
You must be logged in to post a comment Login