Mokokchung nung hotel tasen ka lapokogo

Mokokchung, Yimpoksüi/November 07 (TYO) : Oliorar aser ainlen jajartem asoshi osang tajung kaji; Mokokchung Town Baptist Arogo (MTBA) tenla ki kadak aser PS- I Thana-i aoba lenmang anasa “Hotel TownCentre” ta sür hotel tasen ka mesemogo. Iba hotel-ji MTBA Counselor, Moatoshi-i meshiteta sarasademer lapoktsü.
Iba hotel ya Mokokchung town tiyongzü ka nung aliba agi “TownCentre” ta jatet aser aintsüinlen jajartem asoshi tajung kaji iba hotel atongtsü atema gari hire asütsü menüngdaker. Kechiyong iba hotel ya Mokokchung NST, Sumo stand mesüra night bus anenba tesem nungi tatsüka dang pilar lir.
Kohima aser Dimapur sülenbo Mokokchung town ya tatalokba tesem rongnung ka lir, yangi waliwalir aser limapenzür aika arur, aji saka, parnok anendak tesem peria maliba ngua iba hotel ya lapoktsü shisatet, ta hotel Towncentre kiburi osangbenertem den jembidang lemsatep.
Iba hotel ya tilaka dang, saka iba ajanga Mokokchung rongsenkettsüng ajungketba nung yariba den waliwalirtem aser ainlen jajartem nem maongka agütsütsü nükjidong lir, ta laisa ashi. Ibai Mokokchung atema nüma atangtsü mapa ka lir ama bilemer, ta laisa shisem.
Yangi tzü 24×7 angutsü, gari parking lir, hotel temerük, chiyungtsü tajung aser temerük agütsütsü, hotel room tesatem aser ajak dak alia nisung ajaki atutsüsa jenjang dalangyong room-tem angutsü. Room ajak senteper 9 lir. Room-temji senpak 1000/- nungi 1500/- tsüngda nung angutsü aser iba hotel nung ya dinning hall dena lir. Anungji, nüngdakbapurtemi (9366686528) nung tongteprateptsü akok. Osang tajung kaji; iba hotel ya tasen asünung November ita atema 10-20% discount nung agütsütsü.