Mokokchung nung Int. Nurses Day meraketa mungogo

Mokokchung nung International Nurses Day amungba sentong nung Nurse telok kati ken ajanga shilem agiba noksa nung angur. (Abelen) – noksa nung IMDH MS, Dr. Medem-i kasa sentong nung jembiba noksa angur. (Mokokchung, May 12, 2016)

Mokokchung, May 12 (TYO): Alima ajunga nung May 12 anogo ya Florence Nightingale asoba anogo den repsema International Nurses Day amunger. Mokokchung nunga kasa sentongji Imkongliba Memorial District Hospital (IMDH) OPD hall nung ayongzüka mungogo.
Taküm iba sentong ya ‘Nurses: A force for change: Improving Health system resilience’ omen dak rangloker munga liasü.
Tanü iba sentong nung Mokokchung IMDH, Medical Superintendent, Dr. Medemi jembidang, Mokokchung nung nurse-temi anibelem mesasai kanga meranga aser bendanga agüja inyakba asoshi pelaba olen ka metetdaktsü.
Medical department ya nurse-tem aliba ajanga tali shisangdaktsür, kechiyong “shiranger arudang nenoki tama anepalur aser tatem tashi nenoki dang repranger”, ta paisa ashi.
Doctor-ibo shiranger nem mapang kangabo magütsüteter, saka nurse-temi dang shiranger nem mapang timba agüja anepalur. Anungji, anema aliba (healthcare) luyim tsütsü melenshinüra iba yimyaji nurse-tem nungi tenzüktsüla, ta paisa shisem.
Nurse mapa ya meimchir asoshi inyakba tamaren mapa ka lir, iyongji lokti nung nurse-temji ajaki akhümtsübur. Anungji, nurse-temi pei mapa angateta nüburtem tenzüktsü asoshi paisa ayongzüka liasü.
Tanü putu technology aika adoka maparen balala inyakteper, ajisüaka, nisunger temulungjang aser temeim mapabo technology agi memelentet, ta paisa ashi.
Paisa nurse tem dang Florence Nightingale-i tatishitsü tajung sayuba ama inyaktsü ajungshia liasü.
Taküm küm omen nung ajemdaker Shetoni Sema, Principal SON, IMDH-i power point presentation agüja liasü.