Mokokchung nung International Girl Child Day among

Mokokchung, October 11 (TYO): Mokokchung District Administration, District Level Centre for Women-Mahila Shakti Kendra (BBBP) aser Sakhi-One Stop Centre, Mokokchung-i senteper October 11, 2019 nü Town Hall, Mokokchung nung “Little girls with dreams become women with vision” omen nung ajemdaker International Girl Child Day ayongzüka mongogo.
Iba sentong nung jembidang tetushi tejaoker, Commandant, 44 Assam Rifles, Col. Pradeep Kumar-i, “Tetsür chanutem nem akhüm agüja asen teshisadangba akasotsü atema asenoki iba anogo amonger,” ta ashi.
Nisung ajaki pei dak tamang kateta mulung lemtetra nükjidong atongtsü, ta shia pai tetsür chanutem dang nükjidong tulu atemzüker inyaktsü ajungshi.
Sentong nung shisalen sayur, (UIP and RCH), Mokokchung Dr. Ayangla, DPO-i ‘Girl child health care & personal hygiene’ onük jembi, Jubilee Memorial School nungi Meyiben-i ken ka aten, Town Higher Secondary School nungi Tiarenla-i ken ka aten, Asenla Longkumer (Case Worker-OSC)-i tepela anküp o jembi aser General Secretary, Ao senden, Imtipokyim-i sentong tembanga sarasadem.
Tembang o jembidang Mokokchung Deputy Commissioner, Rajesh Soundararajan-i, tesayurtem aser tetsür kaketshirtem dang Mahila Shakti Kendra scheme ajanga yimtsüngtem nung tetsürtem nem tashi agütsüba osang proktsü mepishiba den külemi One Stop Centre semdangtsü ayongzük.
Sentong tetenzüklen jepdak o jembi (extempore) tetoktepba ka agi aser iba tetoktepba nung Mokokchung nung aliba school trok nungi kaketshirtemi shilem agi. Iba tetoktepba nung mezüngbuba jenjang nung takok angurji Edith Douglas School nungi Tongpangtsula Jamir liasü aser tanabuba o tasembuba jenjang nung takok angurji Queen Mary Higher Secondary School nungi Onenjungla Lkr aser Jubilee Memorial School nungi Anamika liasü.