Mokokchung nung Kumlong Lanur Telongjem tentetogo

Mokokchung, August 17 (TYO): Kumlong Ward Council aser ward nüburtem dang nungi jelia temelaba agiba sülen August 12, 2017 nü Kumlong Lanur Telongjem (Kumlong Youth Association) tentetogo, ta tanü Kumlong Lanur Telongjem Tir, Temjennungsang aser tongti tezülur, Purtoshi nati sangdong ka ajanga metetdaktsü. .
‘Ever Onward’ nükjidong nung tentetba Kumlong Lanur Telongjem temzüng ajanga, iba Telongjem tentet ya ‘yimtenren tentet ka masü saka non-governmental organization’ ka asütsü, aser tenteti Mokokchung nung kin aser lokti balala den amalitepa inyaka yimjung aser telongjem ajungkettsütsü aser temelenshi adokdaktsür ka asütsü, ta shia lir.
Temzüng nungsa lokti ajungkettsü aser terenlok atema inyaktsü, iba den külemi sempet alir lanurtem nem sabang agütsütsü, ta shia lir.
Tentet temzüngji August 12, 2017 nü Kumlong Community Hall nung agizük aser Kumlong Baptist Arogo Asso Pastor, Kikumsungba-i ketdangpurtem aser KLT temzüng meshiteta sarasademtsü.
Mokokchung jila nung Kumlong Ward ya kiyong tulu rongnung ka lir, aser tesüiba küm aika lanur telongjem tentet ka nüngdaka liasü, ta kasa sangdong nung shia lir.
Kumlong Lanur Telongjem nung kiyong nung alir arishi küm 18 nungi arishi küm 45 tsüngdapur lanurtem (tetsür aser tebur naprong) züngoktsü aser Kumlong Ward Council den amalitepa inyaktsü. Iba dak alia tenteti kiyong nung lanurtem atema sentong balala ayonga akatsü.
Tang tasen tentetba Kumlong Lanur Telongjem nung office ketdangpurtem aser lenirtemji Tir- Temjennungsang; tatong Tir, Arenlong; tongti tezülur, Purtoshi; repsem zülur, Limasashi Longchar; Finance Secretary, Aomeren; Asst Finance Secretary, Zulumeren aser Senyur, Imtichuba nunger lir, ta kasa sangdong ajangasa metetdaktsü.