Mokokchung nung Kumlong ward küm 50 ajungba Golden Jubilee mongogo

October 08, 2019 nü Mokokchung nung Kumlong ward pur küm 50 Jubilee mong sentong nung Retired Principal, Akok Walling-i jembiba abelen noksa nung angur. Ajichilen noksa nung Rural Development Minister, Metsubo Jamir-i Jubilee nüngo kaket sayatsüba noksa nung angur.

Mokokchung, Mongputeni/October 08 (TYO): Mokokchung jila kübok kiyong tejentiba rongnung ka aser nütsüng jenti aliba ward, Kumlong tenteter küm 50 ajungba Golden Jubilee Mongolbarnü Mayangnokcha Government Higher Secondary school auditorium nung mongogo, iba sentong nung tetushi tejaokerji Rural Development Minister, Metsubo Jamir liasü, ta Kumlong Ward Golden Jubilee Planning Committee Member, Longrangty Longchar-i sangdong ka ajanga metetdaktsü.
Iba sentong nung kiyong sensotem dak alia tanga colony balala nungi züngsemtem, All Ward Union Mokokchung, Ungma village council, Ao Senden, district administration aser tangartema shilem agia aden.
Iba sentong nung jembidang tetushi tejaoker, Metsubo Jamir-i, ward/colony kaji yimtsüng ka amai lir, kechiyong iba ya nübur temeyoktep balalai akümba lir, ta ashi.
Paisa, Kumlong ward-i Golden Jubilee amongba ya Tsüngrem nungi temoatsü tuluka lir, kechiyong kiyong nungi nisung aikati, talisa lanurtemi state aser linük jenjang tashi nunga takok nguogo, ta ashi.
Iba colony tenteter nem tetushi agüja Minister-i, iba kiyong nung mezüngpurtemi (kibong trok) iba tesem moajang, ta Tsüngrem dang kanga mepia sarasademer alitsüa akok, kechiyong tang nenoki Tsüngrem dang nungi temoatsü kanga angur, ta ashi.
Paisa nüburtem dang tesüiba mapangtem akhümtsübutsü aser aibelena alibatem atema tatok meshitsü ajungshi.
“Nüburtemi Jubilee mapang nung Tsüngrem dang maneni temoatsü aser Pa leniba meshitsüla, ibaji ajanga Kumlong Ward sangertemi tarutsü nunga maneni tajungtiba inyaktettsü,” ta paisa shisem.
Iba sentong nung tongti o jembir, Retired Principal aser shisashir, Akok Walling-i, Anitet kaket nungi Lai o nung ajemdaker, “Jubilee ya tamangba dak sendakba oren ka lir, iba ya temeshi aser Tsüngrem tenüng asangba tetezü ka lir,” ta metetdaktsü.
Akok Walling-isa, “Kumlong ya tesünep nung aliba kiyong ka lir, kechiyong iba kiyong nung yi ayokba aser teküp ayokba ama loktiliba anema inyakertem mali,” ta ashi.
Tesasaba olen ka nung pai, kiyong nung ano teinyaktsü mapa jenti lir, talisa Mokokchung town constituency nung voters timba aliba Kumlong Ward nung tang tashi community hall mali, ta ashi.
Jubilee omen ‘Tsungchi mera’ nung jembidang pai, Tsüngchi tetezü ochi, teladak aser masetshiba lir, aser ‘mera’ tetezü tsüngsü, tsüngnep lir, ta ashi.
Iba dak sendakba nung pai, iba kiyong nung ajak tesünep nung liteper aser pei tera den maitsü sayar, ta ashi.
“Tensa mapang melenshiba den külemi tejakleni aodang akhi sobaliba sendoktsüa akok, ajisüaka iba denji külemi tangatetba shisatsü densema indokra ibaji ajanga nüburtem maitsü samatsü,” ta paisa ashi.
Asen tetsü-tebou nunger tangatetba akhümtsübua, Walling-i, asen otsüla-oboula nungeri nülak songa azüngashiba aser sü tepsetba ama sobaliba inyakyim ajak nungji tangatetba aser tetezü tulu keta lir, ajisüaka tan putu nung item sobaliba inyakyim timbaka mebenshir, iba denji külemi tongtibang tangatetbatema samadar, ta ashi.
Tang nungi tenzüka taruba küm 25 penzüa Walling-i Kumlong ward sangertem dang jila/yimti tangatetba alitsü, shisadangtsü, angatettsü aser rajemtsüla, ibaji ajanga tarutsü nung kiyong aser jila maneni renloktsü, ta ayongzük.
Sentong nungsa Jubilee bangzüng ana renema taruba küm 10 tsüngda multipurpose sports stadium ka yanglutsü aser jila nung tatishitsü tajung aketba ward ka akümtsü atema libajen wazüka ayuba den merükmejua ayutsü bangjem.
Sentong nungsa asürtem bilemteta minute ka mokremer akhüm agütsü aser Kumlong Baptist Arogo Pastor, Rev. I Lima Jamir-i Tsüngrem temoatsü meshia sarasadem.
Sentong tetenzüklen Kumlong Ward Council Chairman, S Lanu Imchen-i lokti pelaa agizükba o jembi aser Mongsenbai Ward Chairman, Temjensangba Longkumer; All Ward Union Mokokchung President, R Ayim Longkumer aser Ungma Village Council tatar, Imtitongba nungeria o tatsütsü jembia liasü.
Ward council züngsemtemi sobaliba ken ka aten, Kumlong Ward Watsü unti-i temeja ken ka aten aser Minister, Metsübu Jamir-i Jubilee nüngo kaket sayaja liasü.