Mkg. Sept. 20 (TYO) : Tan Mokokchung town aser temeket nung light hopta asemshi maru timtemdaktsüba ajanga nübortem maparen aisü nung takoksa ajurogo, saka ketdangsertemi temulung agüja inyakba den nübortemia aremzüka yaritepba ajanga mapang tatsüka tsüngda nung transformer melenteta light arudaktsüba asoshi shilem agirtem ajak dang pelar ta Mokokchung town nung nüngtugu lenir aser Nagaland Electricity Regulatory Committee (NERC) nung State Advisory Committee (SAC) member Wb.M. Bendangnukshi Longkumeri metetdaktsüogo.
Light anogo aika maruba ajanga nübortem kanga timtemogo aser takoksa aika ajuruogo, ajisüaka iba ama timtem aser takoksa ajurubaji ajak asoshi tarutsü atema bilema inyaktsü ayimoktsüba mapa ka südaktsütsüla ta paisa ashi.
Tang ken atema transformer tilaka melener light arubaji asenoki takok tuluka angu amai mebilemtsüla, kechiyong asenoki akhi ama zübazüba lira tsüngküm mapang arudangbo ano light agi meperitsü aser kasa timtem ajurutsü, kechiyong light tashiji tsüngküm nungsa teimba aser tuluba nüngdaktsü ta tebu tedi M.B.Longkumerisa metetdaktsü.
Anungji, memenudang, tangsa transformer tasenba aser tuluba bener arua amenoktsüla, kechiyong Mokokchung ya tuluba tuluba küma aienba town ka lir aser yamaji light tashiji tuluba nüngdaker ta paisa metetdaktsü.
Ano, kanga nüngdakba kaji Power department-i Mokokchung nung light agütsüba maparen nung nüngdak ajak mapang shitak nung melenteta anepalutettsü asoshi ‘maintenance funds’ peria agütsütsüla. Item jagi nüngdakba mapang nung fuse wire, transformer oil, aser switch gear ama alitettsü ta Wb.M.B.Longkumerisa metetdaktsüogo.
You must be logged in to post a comment Login