Mokokchung nung Live Medical Workshop akar

Mokokchung, Aug 22 (TYO): Ao Baptist Arogo Mungdang (ABAM) aser Indian Medical Association Nagaland Chapter na külem sür “Live Laparoscopic Surgical & Gynecological Workshop cum continuing medical education (CME)” ta sür sentong ka Bodbarnü nungi yangi Mokokchung nung kadaki.
Iba workshop sentong den repsema Aug 23 & 24 anogo ananü ‘Laparoscopic operation camp’ ka akatsü aser iba camp nung surgical aser gynecological operation-tem operation taa kecha magii agitsütsü aser iba atema Indian Medical Association Nagaland Chapter nungi specialist doctor-tem aika Mokokchung arua tonga lir.
Tanü iba workshop tenzükba sentong nung Indian Medical Association Nagaland Chapter nung tir, Dr. Kezevituo Keditsu-i mapang tatsüka agia jembidang, iba sentong ya tongtibangsa Mokokchung nüburtem yariba den külemi Laparoscopic surgery nüngtugu kümdakja IMA inyakyim metetdaktsütsü nükjidong yur ayongzükba lir, ta metetdaktsü.
Laparoscopic surgery ya kanga tongtibang lir, anungji, ibai jangraa angazüktsü asoshi paisa ajungshia liasü. Paisa Naga nunger doctor-tem dang lungjema aliba den mulungsentsü melenshir nüburtem tenzüktsü asoshi tayongzükba ka agütsü.
Sentong balala nung shilem agitsü atema IMA Nagaland Chapter nungi züngsemtem Kohima aser Dimapur nungi; Dr. Kezevituo Keditsu (Gynecologist), Dr. Victo A Wotsa (Gynecologist) Dr. Vikethonyü (Surgeon), Dr. Tseilhoutuo (Surgeon), Dr. Temsüla Alinger (Surgeon), Dr. Kikrukhrietso (Surgeon), Dr. Bernard Amer (Surgeon cum Urologist), Dr. Khrisatalie (Anesthetist), Dr. Kevilhounyii (Gynecologist), Dr. Keneilhoulie (Anesthetist) aser Dr. Imsulemba Jamir (Anesthetist) parnokji arua lir. Iba den ano Mokokchung nung aliba doctor-temia yariteptsü, ta angazüker.
Live Laparoscopic Surgeries-temji IMDH aser Impur Christian Hospital na prongla nung agitsü, ta angazüker. Iba ama maoangkaji aibenbo marutsü, anungji, nüngdakbapurtemi iba teyariji agitsü junger.