Mokokchung nung mezüngbuba A.A mungdang akar

Mokokchung, Dec 6 (TYO): Mokokchung Town Baptist Arogo kübok Alcoholics Anonymous (AA) Fellowship Mokokchung-i ayongzüka “AA Unity our Responsibility” omen nung ajemdaker yangi Mokokchung Town Hall nung mezüngbuba “AA Convention Nagaland” sentong ka kadaki.
Iba sentong nung Mokokchung district den külemi Darjeeling, Jorhat, Kohima, Shillong, Guwahati nungi A.A pur noklang asem shi arua shilem agia dendaki. Tanep iba sentong nung Mokokchung Deputy Commissioner, Sachin Jaiswal IAS-i tesentepertem dang tangar asoshi nenok ya tatishitsü taküm kaka asütsü tayongzükba ka agütsü.
Iba sentong ya tongtibangsa tangar dang nungi angazüktsü nükjidong nung ayongba lir, ta MTBA A.A Fellowship ketdangsürtemi lemsatepa liasü. Iba sentong ya MTBA Mission Board-i teyari agüja ayonga akar.
Anogo ananü (Dec 6 & 7) agitsü aliba sentong nungji tongtibangsa achi ajemba yimya tamajung nungi koda pilaa alitsü (Relapse Prevention), yimyayimpong melenshiba (Behavioral change), A.A kibongtem atema Al-anon, Al-ateen sentep balaka, yangji adenertemi pei taküm nung ajangshibatem, Tsüngrem den taküm aser ano tangazükba balala agitsü sentong balala renema lir. Tatem sentong nung sempet lepsalaba mapang alitsü.