Mokokchung nung mid-day meal jang tamajung alem

Mokokchung, March 9 (TYO): School Education Department-i Mid Day Meal (MDM) Scheme kübok Mokokchung jila nung mesen keta aliba jang tejen alemba atema kanga aoksar, ta Mokokchung Town Lanur Telongjem (MTLT)-i metetdaktsü.
SDEO Office Mokokchung ajanga mesen keta aliba jang tejen agütsü ta osang balala sangoktsüba sülen MTLT-i osang jangjashitsü atema March 9, 2016 nü Mokokchung jila nung government Primary aser Middle School kar sema ao. Iba mapang MTLT-i jang bosta aika techiyungtsüsa masü raksar aliba aser mesen keta aliba jang tenük agi nguogo, ta Public Grievances Cell MTLT, Mokokchung sangdong ka nung metetdaktsü.
“Iba ama jangji ak-ia machitsü” ta school balala nung tesayurtemi onok dang ashi. School ketdangsertemi tanur nem jang tamajung mechiyungdaktsünüba agi kaketshirtem midday meal mangu süoigo. Ajisüaka, ketdangsertemi jang tamajung magütsütsü lemtetba atema parnok nem tenüngsang agütsür, kechiyong ibaji ajanga kaketshirtem temang nung timtem adokla. India kübok state kar nung tanurtem mid-day meal chiyungba sülen miim chisemer shirangtepba osangtem angazükogo,” ta MTLT-isa metetdaktsü.
Bangdak department-i school balala nem jang agüja aliba melena jang tajung agütsütsü ayongzüker. Mid-day Meal scheme ya centre sorkari teyari agüja inyakba maparen ka lir anungji Centre sorkari kaketshir nem jang tamajung magütsütsü. Anungji, kodaser Directorate of School Education, Kohima (DOSE)-i jang junga mereprangi agütsü ta MTLT-i asüngdanger.
MTLT-isa school tem dang kaketshir nem jang tamajung magütsütsü saka tajung melentsü atema mapa inyaktsü mepishir. Mokokchung jila nung aliba school kar nung danga tanurtem miim chisemer kangshiba osang angazükra, iba tebilemtsü khuretji bangdak school ketdangsertemi abentsü, ta MTLT-isa ashi.
Food Safety Officer (FSO), Department of Health & Family Welfare-i MDM jang malemdang tendanga mereprangba atemaa MTLT tasüngdangba akar.
Kaketshirtem asoshi shisaliok aser temang anema alibaren bilemja senso tajungtemi MTLT nem iba osang sangoktsüba atema kanga pelar. MTLT-i iba onük süoki ia bilemer aser bangdakpurtemi tekaratiba nung jang tamajung melentsü imlar, MTLT-isa metetdaktsü.