Mokokchung nung Mission Indradhanush indang workshop agi

Dimapur, October 6 (TYO) : October 5, 2015 nü IDSP Hall, IMDH Mokokchung nung Mission Indradhanush atema Mokokchung District level workshop agiogo.
Sentong tetenzük nung Dr. S.S. Akaba Longchar, CMO Mokokchung-i Mission Indradhanush indang osang tatsü agi metetdaktsü aser Medical Officers ajaki bendanga agüja aser nendaka iba mapa inyaktsü ayongzük.
Iba workshop nung shisalen sayurji Dr. S. Sarkar, Surveillance Medical Officer (WHO) liasü aser pai Mission Indradhanush indang inyakyim rasaa metetdaktsü.
Iba mapatong ya October 2015 nungi January 2016 tashi inyaktsü aser iba mapang arishi küm 2 nungi teküpok aliba tila tanur ajak nem noktangtetba tashidak 7 indang vaccine agütsütsü alizüng lir, ta Dr.S. Sarkar-i ashi.
Lungro yangludak, kisüjensüdak amala tesem nung GNM/ANM malir aser item amala tesem ajiteta immunization session agitsüla, ta paisa metetdaktsü.
Mokokchung Deputy Commissioner menden ser District Task force kati iba mapatong ketdangsüa reprangtsü aser workshop nung adenertem Capacity building, Micro planning, selection of Man power, Media coverage aser Mass Media Information nungertem indang tesayuba agütsü.
Iba mapatong nung senotsü dak sendakba osang Dr Temsuyanger DPO (UIP& RCH) Mokokchung-i metetdaktsü aser paisa block balala nung aliba Health Workers atema Medical Officers-i training agitsü mepishia metetdaktsü.
Iba sentong nung CMO, Dy.CMO aser Medical Officer dena Mokokchung nung DPMU Staff ajak aden.