Mokokchung nung Moatsü benjung kanga mera keta mungogo

Noksa nung (abelen) Dr Shurhozelie nem senpettsüdang aser (achiji) Akolongshi teloki sobaliba sayasapong ka aiba angur.

Mokokchung, May 2 (TYO): Ao Sendeni Moatsü benjong sentong tulu ka yangi Mokokchung Imkongmeren Sports Complex nung ayongzüka mungogo. Iba sentong nung Ao senso sangertem den Angami Public Organization (APO) nungi nübu meyirijang dak tema arua benjong kanga longsodaktsü.
Tanü iba sentong nung Ao Senden kübok tzükong balala den Psalmodic Ensemble, Salokum Roko Ungma aser Angami Public Organization (APO) kübok Northern, Southern aser Western nungi telok balalai akhi tsürabur yimya nung sobusolem akhümketa sobur yar tsüngsang aser sobaliba kentenmenü tapu balala ia shilem tajung agia tesentepertem kanga benjongtepogo.
Iba sentong nung tongti tesemdanger Nagaland Chief Minister Dr. Shurhozelie Leizeitsü-i jembidang, Nagaland ya benjongbentsü lima ka lir, kin balalai mongpu shia nung benjong balala amunger. Anungji, benjong ya longsotepa aser chiyungtepba mapang ka dang masü saka ibai asen sobaliba nela ka lir, ta metetdaktsü.
Benjongbentsü ya rizünga ayuba mapang ka dang masü saka ibai asen sobaliba wazüka ayuba maparen ka lir, anungji, Naga nunger lokti asoshi benjongbentsüji kanga tongtibang lir. Aji oda, asenoki ibai tajunglen tamshi shia amshitsüla, ta pai tayongzükba ka agütsü.
“Ao kinji tia takatiba nüburtem lir, Ao kinji lenla aika nung samanir asünung, Naga nübur rongnunga tedi tambusang ka ama inyaktsü onoki nenok nungi imlar. Iba khuretji lanu putu nema angatetdaktsütsüla”, ta pai ayongzük. “Kodang nai tedi tambusang ama inyakdir, tangartemi nenok dak rangloktsü aser iba tsüngsü nung jajatsü”, ta paisa ashi.
“Tanü asenok ya aso 21 buba nung alir. Nisungchi ama asenoki bilemer, ibaji atangji süra, asen lima ajungtsü atema nisungchi ka ama asenok ajaki tajungtiba inyakdi”, ta pai ayongzük.
“Naga nunger ya talangka shiranger, iba tebilemtsü ya tarutsü putu nem mebenloktsütsüla. Tang koba Naga yimden tebilemtsü lir, ibai ajaki agizüktettsüsa aser teti asoshi telatetba dangi arutsü ajaki tajungtiba agi shilem agitsüla”, ta paisa inyakdaktsünüba olen ka ashi.
“Asenok ya tejakleni aor ama bilemer, saka khenkhenbo asenok ya kechi jenjang nung lir ta aroka bushisüngdangtsüla aser süoki ia bilemdangtsüla”, ta ashi. Kin anasangeri iba ya tetenzüker ka südaktsür yimjung aser temeim osangji tanüngba nüburtem dangi peroktsü asoshi paisa ayongzüka liasü.
Tetushi tejaoker APO tir Dr. Vilhusa Seleyi-i mapang tatsüka agia jembidang, Angami nunger ajak tenüng nung Moatsü salem lemsatepba den Ao kini sentong tajung yanglur parnok jaokba asoshi mezüngbuba pelaba metetdaktsü.
‘Tanü ya asenoki tarutsü atema otsüsütsü yanglur. Naga nunger ajak ya metsü (seed) aser tera (root) ka dang aser sobaliba ka ta onoki amanger, saka tongtepratep junga maliba ajanga tanü asenoki balala amai bilemer’, ta pai ashi.
“Meraket linük mesüra nübur ka yangertsü asoshi asenok ka akümtsüla aser kati ka den tajungleni agizükteptsüla”, ta ashi. Aji oda, “Moatsü benjong amungba mapang kin ana ajurutepba ya tangar amokbangtsü atema lungjemerba masü saka asen nübur anitsü aser tarutsü asen lima yangerba nung tangar nem yimli agüja meraket linük ka yangertsü asoshi lir”, ta paisa shisem.
Asen sobaliba aser benjongbentsü yagi asenok sendaktepdaktsür, aser iba ama sobaliba maparen ajanga Naga loktiji tanaben asentenshidaktsür aser lungjemtsü asoshi tashi itdaktsür, ta paisa ashi.
Angami nunger tanga kin den lembutepa aliba rongnung Ao kin den teimtiba lir, iba jagi asenok sobaliba, yimyayimpong, libaliru, kati ka agizüktepba, jenjii otepba aser tapu aika nung mesüktepba sayur, ta ashi.
‘Aorji sempet aser temaotsü aketba kin ka lir, Ao kinji shisashir aser lenir adokdaktsüba kin lir’, ta ashi. ‘Tanü Ao Sendeni achayanga kin ana lungjemdaktsüba amai tarutsü nunga tanga kin ajak lungjemdaktsütsü imlar’, ta paisa shisem.
APO tir Dr. Vilhusa Seley-i Ao Senden nem tetushi agüja Angami nunger jung ka aser rong nület ka ta senpettsü. Tatem nung Aor sobaliba nung aketba ama aksü maparen inyaka iba sentong tobur junga tembang.
Sentong nung Ao Senden tir C. Angang Jamiri tarur ajak pelaa pelaa agizükba den Forest, Environment & CC minister Imkong L Imchen, Addl. Chief Secretary & Finance Commissioner Temjen Toy IAS, CNTC executive G.K Zhimomi, ENPO tatong tir Mongko, Watsü Mungdang tir Moachila nungertemi Moatsü salem lemsatep.
Taoba Ao Senden tir M.B Longkumeri melepzüng o jembi. Iba sentong ABAM executive secretary Rev. Dr. Mar Atsongchangeri temoatsü meshia sarasademer tenzük aser Kumlong Baptist Arogo pastor Rev. Lima Jamir den sarasadema tembang. Tongti tesemdanger Dr. Shurhozelie meina par külem medemertem aser sorkar tulur aika aru.