Mokokchung nung National Voter’s Day mungogo

Aenjeti 25, 2018 anogo Town Hall, Mokokchung nung 8buba National Voters’ Day amungdang DC & DEO, Mokokchung, Sachin Jaiswal IAS den ketdangsertem aser voters tasen enroll asürtem külemi tangokba noksa nung angur.

Dimapur, Aenjeti 25 (TYO): Town Hall, Mokokchung nung Aenjeti 25, 2018 nü 8buba National Voter’s Day 2018 mungogo. Voters tasen züluoker nem Deputy Commissioner aser District Election Officer, Mokokchung, Sachin Jaiswal, IAS-i iba anogomung nung tenüngsang aser totushi agüja liasü.
Iba sentong nung jembiba mapang, DC aser ERO, Mokokchung, Sachin Jaiswal-i, iba anogomung indang omen, “Accessible Election” ya Nagaland den kanga putepa lir, ta ashi. Voter tem anogomung amungba nükjidong ya asen temeden metettsü asoshi lir, ta pai ashi. Sachin Jaiswal-i voters tasentem den tepela lemsatepa jembiba mapang, asenok dak khuret abenba melira tarutsü atema kicha meinyaktettsü, ta ashi.
Iba sentong nung Chief Election Commissioner-i yokba osang ka sentong mendenpuba aser EAC (HQ), Km. Fithu Lichui-i zünga ashi. Kasa sentong nung taruru pela agizükba o ya ADC aser ERO, Mokokchung, W. Manpai Phom-i jembi aser Apang Aier-i temeja ken ka aten. Iba sentong nung EAC (HQ), Daniel Angami-i tepela o jembi aser voter’s pledge ya DC & DEO, Mokokchung, Sachin Jaiswal-i agi.