Mokokchung nung NCC Camp nung cadets 350 adenshia shilem agidar

Mokokchung nung NCC Camp agiba mapang district pongu nungi NCC cadet-tem den Camp Commandant Col. Alhawat aser Dy. Camp Commandant Lt. Prof. Aghato Sumi noksa nung angur. Mokokchung, Mongputeni /October 3, 2018.

Mokokchung, Oct 3 (TYO): Taoba September ita 27 nungi tenzüka Mokokchung nung NCC Camp ka kadaki. Iba Camp nung Mokokchung, Longleng, Tuensang, Zunheboto aser Mon district-tem nungi NCC cadet parnok 350 arua shisatsü balala angazüka mungdar. Camp Commandant Col. V. Alhawat aser Dy. Camp Commandant Lt. Prof. Aghato Sumi na lenisüba nung iba Camp ayonga akar.
Iba camp nung cadet-tem nem shisalen sayur tapet nisungtem jaoka nübusen renlokba, anogo shia taküm nung nungdakba tasa balala, map azüngba yimya, prangpong balala sayuba den injang akaba yimya, temang anema alitsü atema health & hygiene, HIV/AIDS onük nung tesayuba, alima yimya lendong atalokdang taküm kümzükba yimya, sobaliba sentong aser ano tapu balala agitsüba lir, ta Dy. Camp Commandant, Lt. Prof. Aghato Sumi-i iba osangbener den jembidang ashi. Iba Camp ya Oct 6, 2018 tashi agiyonga aotsü, ta paisa shisem.