Mokokchung nung “Open Defecation Free” sentong agi

June 11, 2016 nü Town Hall, Mokokchung nung SBM kübok ‘Open Defecation Free’ sentong agidang Swacch Bharat Mission (SBM) District Ambassador, M. Bendangnukshi Longkumer, Mokokchung DC, Sushil Kumar Patel, IAS, department balala nungi ketdangsertem aser yimtsüng balala nungi teshimtet nübotem külemi agiba noksa angur.

Dimapur, June 13 (TYO) : June 11, 2016 nü Town Hall, Mokokchung nung Swacch Bharat Mission (SBM) kübok Ongpangkong North/South atema “Open Defecation Free” meteta lidaktsütsü atema sentong ka ayongzüka agi.
Iba sentong ya District Water and Sanitation Mission-i ayongzük aser District Administration, Health & Family Welfare, PHE Department nungi ketdangsertem den yimtsüng balala nungi teshimtet nübotem aden.
Sentong nung SBM District Ambassador, M. Bendangnukshi Longkumer-i o jembidang, SBM indang alizüng tongtipangtibaji India merüktettsü atema lir, ta ashi.
“Iba alizüng tongtettsü atema loktiliba kübok shilem ajaki “Open Defecation Free” kanga junga meteta alitsüla, anungji tesentepertem ajaki lipoküm merükmejua ayutsü atema meranga inyaktsü ayongzüker,” ta Bendangnukshi-isa metetdaktsü.
Nagaland nung aliba district tem rongnung Mokokchung ya temerüktiba ta jembir, anungji asenoki jana endokba, kima nung natzü anaba amala inyakyim kanga kümdangtsüla, ta paisa shisem.
Sentong nung Mokokchung Deputy Commissioner, Sushil Kumar Patel-ia o tatsüka jembidang, yimtsüng tia nung alirtemi kima nung metsümeshiba inyakyim anendaktsütsü atema village council temi tongtipang shilem agitettsü, ta ashi.
Sushil Kumar-isa, yimtsüng shia nungi arurtemi pei pei yimtsüng nung temelenshi bener arurtem asütsü ayongzük.