Mokokchung nung Plastic waste management indang sentong ka agi

Mokokchung, Rongchii/April 25 (TYO): Mokokchung jila nung Mokokchung Municipal Council (MMC)-i Clean Mokokchung Campaign (CMC) den ayongteper Plastic waste management indang awareness sentong ka agi, ta tanü ketdangsertem osang ka ajanga metetdaktsü.
Awareness sentongji Jubilee Memorial School, Queen Mary Hr. Sec School aser Mayangnokcha Government Hr. Sec School, Mokokchung nung agi.
Iba campaign ya anogo ananü- April 24-25 anogotem nung agi aser sentong ajak nung W. Manpai Phom leniba nung MMC züngsemtem, ADC & Administrator MMC aser CMC züngsmetemi school asemprong semdanga liasü.
School asemprong nung W. Manpai Phom-i okila jembia liasü. ADC-i plastic amshiba ajanga timtem agütsüba anema MMC aser State sorkar nati inyaka aruba mapatem metetdakja kaketshirtem dang plastic amshiba ajanga mopung menenba nokdangtsü ayongzük.
CMC nungi züngsemtem aser shisalen sayur asemji- Limasenla Jamir, Asst. Prof. Jubilee Memorial College, Sashinungla Nathan, Proprietor, Blossoms pre-school aser Hannah Imchen, Phonetics Trainer nunger liasü. Parnoki plastics amshiba aser ibaji ajanga mopung menentsüba aser meimchir nem timtem agütsüba indang metetdaktsü.
Parnokisa plastic mamshitsü, tanaben amshiba aser ajema amshiba indang metetdaktsü.
MMC aser CMC züngsmtemisa school notice boards nung plactic dak sendakba posters malokja liasü.