Mokokchung nung police-i ILP malir nisung 11 apu

Dimapur, July 9 (TYO) : Ao Students’ Conference (AKM) aser Mokokchung Chamber of Commerce & Industries (MCCI) nati shidi ka ajanga Mokokchung Deputy Comissioner dang, April 20, 2015 nü senden amendang lemtetba nung ajemdaker nai züluba shidi aser iba sülen June 9, 2015 nü office ajanga agütsüba shidi nung ‘Weekly Bazaar’ shishilembartem dang nungi amokmeren timtem balala majurutsü atema ozüng peria lateta lir ta shia lir, ta metetdaktsü.
AKM Tatong Tir, Akummeren Longchar aser MCCI Tongti tezülur, Limalenden Longkumer nati Mokokchung DC dangi züluba shidi nungsa, “Ajisüaka lateta aliba ozüngtemji onok mulung asütsüsa mapa küma meinyakba ajanga iba shidi ya nü office dangi zülutsüsa akümer,” ta metetdaktsü.
“Shishilembar nisung 11 tashi ILP tejangja maliba ajanga New Reserve Area (DEF), Mokokchung nung police-i apuba osang tejangja onoki angashiogo. Mokokchung Police-i kanga wainshina item tai aketer nisungtem apuba atema onoki pelaba metetdaktsür,” ta kasa shidi nung shia lir.
Iba ken o nung ajemdaker onoki item tasüngdangbatem atema nü dang nungi tekaraba nung telangzüba angutsü imlar, ta shia item onüktem asüngdangogo:
1. Osang angashiba agi, item nisung 11 ya New Reserve nung apu. Süra parnok ya kodaser Tuli tesem nung aliba inter-state Police check gate ajanga aittet?
2. Parnok mena aliba Bolero pick-up gari pongu den yangji aliba khutemji kechiba ketdangsertemi pua mayu?
3. Ozüngi melaba ama item gari indang vehicle aser road permit lir mali asü?
4. Parnoki bena aliba khutemji bangdak ketdangsertemi kanga junga mita repranger asü?
“Mokokchung district nung Weekly Bazaar inyakyim atema April 20, 2015 nü lateta aliba ozüngtem shitak benoktsüla, aji mesüra Weekly Bazaar ya tangsa shibangtsü onoki akhanger,” ta kasa shidi nung zülua lir.