Mokokchung nung Power Transformer raksaogo

Dimapur, August 26 (TYO) : Mongulbar nikongtsütsü Mokokchung town main sub-station nung 33111kv 5MVA transformer raksa aser ibaji ajanga power kanga ajema kümogo, ta Executive Engineer, Mokokchung Electrical Division-i sangdong ka nung metetdaktsü.

Iba transformer ajanga Mokokchung jila aser temeket aliba yimtsüngtem nem power agütsür. Department-i takokba tashi transformer yanglutsü atema mapa inyakdar saka spares peria maliba ajanga anogo ishika nungang yanglutettsü, ta Executive Engineer-isa sangdong nung shia lir.

Iba khuret ajanga jila nung ghonda anana heavy load shedding alitsüsa akümer aser ano Khensa, Mekuli, Ungma, Chuchuyimpang, Longmisa, Mokokchung yimtsüngtem den DEF & FAC Area nungertem nung timtem ajurutsü. Anungji nübortemi iba timtem arema atatsü mepishir ta Executive Engineer-isa metetdaktsü.