Mokokchung nung PWD Office Complex semzükogo

Tongdentsuyong Ward, Mokokchung nung March 12, 2025 nü PWD Office Complex semzükba sentong nung Minister, Housing & Mechanical Engineering, P. Bashangmongba Chang-i jembidang tangokba noksa nung angur.

Dimapur, Metsüremi/March 12 (TYO): Minister, Housing & Mechanical Engineering, P. Bashangmongba Chang-i March 12, 2025 nü Tongdentsuyong ward, Mokokchung nung PWD Office Complex semzüktsü.

Iba sentong nung jembidang, Chief Minister, Dr. Neiphiu Rio-i mangdang tajung yur state nung ki o jen yangluba nung temulung agütsüba atema Minister Bashangmongba Chang-i pelaba lemsatep.

Iba project ya Nagaland kanga junga asameyanga tanü tensa den apet yanglutsü pa indang mangdang sayur, ta pai ashi.

Iba ki tasenba ya Mokokchung district aser alema oa tejakleni aoba aser terenlok temaitsü, kong mapa inyakertem sadoksayima inyaktsüsa yanglua lir, nüburtem nem service tajungba agütsütsüsa, ta pai ashi.

State nung Public Works Department ya tongtipang department ka lir, koba ajanga indang indanga lenmangtem, ki o jen yanglur aser complex tasen ka bendenlokba ajanga department-i mapang shidak nung nübur nem service agütsütettsü, ta Minister Bashangmongba Chang-i ashi.

Pai ketdangsür aser staff tem dang ochi shia bendanga agütsür nübur tenzüktsü ajungshia liasü.

Iba sentong nung CE PWD(H), Er. Hozheto Shikhu aser Imti Ozukum, Tongdentsuyong Ward Chairman natia o tatsütsü jembia liasü aser J.E.PWD(H) Mokokchung Division, Er. Talitemjen Jamir-i technical report agütsü.

Sentong nung E.E. PWD (H) Mokokchung Division, Er. Chengato Kath menden liasü, S.E. Circle-1PWD (H), Kohima, Er. Supongliba-i melepzüng o jembi aser MTBA Pastor Monglier-i iba ki meshiteta sarasadema liasü.