Mokokchung nung RTI Week among

Mokokchung, Mongputeni/October 10 (TYO): Tanü ADC, Planning Conference Hall, Mokokchung nung Mokokchung District-i “RTI and The Role of Citizens” omen nung ajemdaker RTI week ayongzüka mongogo, ta ketdangsertem osang ka ajanga metetdaktsü.
Iba sentong ya Assistant Commissioner, Minga Sherpa, IAS (P) leniba nung agi aser shisalen sayurji Project Assistant (MDLSA), Sentinaro Longchar liasü.
Sentong nung lai RTI indang metetdaktsü.
Project Assistant (MDLSA), Sentinaro Longchar-isa, RTI ya kanga tongtibang Act ka lir, koba ajanga linük nung sorkar inyakyimtem indang osang metettsü atema nüburtem nem tashi agutsür, ta ashi.
Okila jembidang ADC & PIO Mokokchung, W. Manpai Phom-i, RTI ajanga sorkari nübur nem tashi tulu agutsüogo, ta ashi.
Paisa iba temeden ya loktiliba jenjang majungtsüsa tim mesüi mamshitsüla saka sorkar inyakyimtem teladak südaktsütsü atema hadir ka ama amshitsüla, ta ashi.
Assistant Commissioner, Mokokchung Minga Sherpa, IAS (P)-i lokti pelaa agizükba o jembi aser SDO (C) (Judicial), Thungchanbemo Tungoe-i tepela anküp o jembia liasü. Kasa sentong nung RTI indang film saya aser RTI indang kakettem lema agutsü.