Mokokchung nung saru menoker sensaksem sentong agi

Office of the Principal Chief Commissioner of Income Tax, NER, Guwahati ajanga July 29, 2024 nü Deputy Commissioner, Mokokchung indang Conference Hall nung Interactive Outreach Programme, 2024 ayongzükba nung Principal Chief Commissioner of Income Tax (NER), Chaitali Panmei IRS, Deputy Commissioner, Mokokchung, Thsuvisie Phoji aser ketdangsürtem noksa nung angur.

Dimapur, Chiteni/July 29 (TYO): Saru menokertem shisadokden senden ka Office of the Principal Chief Commissioner of Income Tax, North East Region (NER), Guwahati ajanga July 29, 2024 nü Deputy Commissioner, Mokokchung indang Conference Hall nung ayongzüka liasü, kong district nung aliba NGOs, shishilempar aser entrepreneurs nungi teshimtet nisungtem dena liasü.

Iba sentong nung jembidang Principal Chief Commissioner of Income Tax NER, Chaitali Panmei-i, Income Tax Act, 1961 indang Section 10(26) ajanga North East India nung tribal pur dang saru memeshitsü shia liaka tangazüktsü jenti lir aser ibaji ajanga region nung nüburtem senotsü tsütsü yimya meteta akumtsü, ta ashi.

Asenoki tanü Mokokchung nung metsü proker, saka küm ishika lir nüburtemi tanü agiba sentong ajanga kongshiba aser iba nungi tajangzük anguba indang metettsü, ta lai ashi.

Income Tax nungi Principal Chief Commissioner, NER-i anir ketdangsürtem pela agizükba o jembidang department-i timtem arema district nung iba amala sentong ayongzükba atema Deputy Commissioner, Mokokchung, Thsuvisie Phoji-i pelaba lemsatepa liasü.

Income Tax indang jembira, region nung aser talisa district nung aliba nüburtemi junga memetet, ta pai ashi. Iba sentong ya tenük lapoker asütsü aser tanü iba sentong nung angazükba ajanga tarutsü nung district nung aliba nüburtem ajangzüktsü, ta paisa ashi.