Mokokchung nung Swachh Shakti Week tenzükogo

Mokokchung, March 02 (TYO): Swachh Bharat Mission nung tetsürtem shilem jangja metetdaktsütsü asoshi PHED Mokokchung Division aser WSSO na sentepa Mokokchung nung “Swachh Shakti Week” tenzükogo.
Iba inyakyim ya tanü Brihostibarnü tenzük aser tan itasa tembangtsü.
Department-i March 8, 2017, International Women’s Day tashi sentong balala renema lir, ta ADC Planning, Mokokchung, Conference Hall nung PHED Executive Engineer Yanger Pongen-i “Swachh Shakti Week” kechi atema amunger ibaji rasaa ashidang metetdaktsü.
Iba sentong nung tetushi tejaoker, Assistant Commissioner, Mokokchung, Chaitangya IAS-i, Swachh Bharat Mission atema tetsürtemi mapa tulu inyakba asoshi parnok nem tenüngsang agütsü aser Mokokchung jila nung moapu nung metsü meshiba (Open Defecation Free (ODF)) taküm küm tatem tashi nungbo anendaktsütsü nükjidong lir, ta ashi.
Yimya sübar aliba, moapu nung metsü meshiba melenshidaktsütsü mapaji kanga melarabo masü aser 2017 küm ‘Mokokchung ODF’ nükjidong atongtsü mapaji tasak lir, ta pai ashi.
Iba dak sendakba nung paisa, iba nükjidong atongtsü asoshi inyakyim balala agi inyakdangtsü aser kanga junga asayadangtettsü asoshi field worker temi inyakba ajak züludena ayutsüla, ta shisem.
Maneni pai, PHED department-i nüburtem asoshi sanitary project aser tzü tamajung odaktsütsü aoshi inyakyim balala inyakba atema tenüngsang agütsür, ta ashi.