Mokokchung nung tantsü-tambutem sentong agi

December 16, 2015 nü Multipurpose Hall Mokokchung nung Elders Meet alidang tetushi süa jaoker Thongo Imlong-i o jembiba angur.

Dimapur, December 16 (TYO) : Mokokchung jila küm 125 ajungba nüngtem nung Mokokchung nung aliba tantsü-tambutem asoshi sentong balaka ayongzüka agi.
Iba sentong ya December 16, 2015 nü Multi Purpose Hall nung Social Service Society, Red Cross, Doctor’s Forum aser Rotary Club, Mokokchung temi ayongzüka agi.
Sentong nung tetushi süa jaokerji Imlong Chang’er jabaso Thongo Imlong liasü.
1890s tatemlen Mokokchung jila kümteta aoba maparen nung Imlong Chang-ia tongti shilem agia liasü.
Sentong nung Thongo Chang-i o jembidang, Mokokchung jila inloka arudang tensa tajung aser tamajungtem ajurua aruba indang ashi.
Paisa tanü sentong nung adenertem dang pelaba metetdaktsü aser item nisungtem ya Mokokchung jila tongshitem lir ta ashi.
Sensaksemba mapang alidang tantsü-tambutemi khuret süa bilemba metetdaktsübaji Mokokchung nung Health Sector indang liasü.
Nagaland nung mozüki tejentiba rongnung IMDH ya ka lir, ajisüaka tanü-asüng amshiba machinery/equipments aser department aika nung specialist doctors maliba ajanga Mokokchung nung shirangertem aika Kohima aser Dimapur aser ano anameta aliba state – Assam o Meghalaya temi aotsüsa akümer.
Iba ya timtem dang masü saka rongdak mapangtem nungbo senti taküm lalur, ta parnoki ashi.