Mokokchung nung totzü ayokdak shibanga yuja lir

Police-i Mokokchung town nung aliba AOC ka shibanga yutsüdang tangokba noksa nung angur. Mokokchung, Oct 6, 2016.

Mokokchung, Oct 6 (TYO): Mokokchung town kübok Süngkomen ward nung totzü ayokdak Ongpangkong Petrol Pump Co-operative Society Ltd (AOC) nung totzü liter shitak magütsür ta sür Ongpangkong Kaketshir Mungdang (OKM)-i kuli kar puteta keno agütsüba ajanga iba kenoji mebentet tashi AOC-ji melapoki atatsü asoshi Brihostibarnü shibanga yuja kar.
Oct 5 Bodbar aonung 7:40 ako meta OKM ketdangsür kar iba AOC jagi totzü liter ka talii aru aser liter ka alidangji totzü agütsüba kol (meter reading) nungji liter ana (2) adok. Anungji, tim mesü alibaji ngua yangji inyaker Manager aser staff-tem den jembitepdang parnokia kol nungji timtem lir ta nangzüka liasü, ta OKM lennirtemi osang zülurtem dang ashi.
Tesülen AOC nung inyakertem jagi iba double petrol/diesel kolji Oct 4, 2016 nungi mapa junga meinyaker ta nangzükba ka Oct 5 nüji AOC Manager-i kuli agütsüba indang, OKM lennirtemisa osangzülurtem dang ashi.
Iba dak sentakba nung OKM-i Mokokchung Deputy Commissioner dangi tatalokbatemji tatongi zülur aibelenertem anema tapet mapa inyaktsü asoshi tezüluba ka nung agütsüogo.
Kasa keno dak sentakba nung Hokolbar anepdang 9:00 ako nung AOC nung aliba kol-temji shitak mapa inyaker asü masü’ar ibaji reprangteptsü, ta osang ajanga angazüker.
Iba osang ya angashia Mokokchung district administration den police aser department of legal metrology & consumer protection nungia ketdangsürtem arua AOC-ji semdanga liasü aser iba keno telemtetba ka dangi maru tashi ibai melapoki atatsü asoshi district administration tetuyuba nung police-i shibanga yutsü.