Mokokchung nung Tsüngremmong Extravaganza-III kaogo

Mokokchung, August 02 (TYO): Aor benjung, Tsüngremmong dak sentakba nung August 01, 2015 aonung Mokokchung, Cosmos Entertainment Hall & Restaurant nung ‘Uplifting young talents’ omen nung Tsungremmong extravaganza III kanga junga kaogo, iba sentong nung tang sempet arangshir- model tem, designer tem, kentenertem aser tsüngsangertemi shilem agia liasü.
Iba extravaganza sentong tayonger Temsu Kichu-i, asen lokti nung sempet tajung aketer lanur aika lir, aser parnok sempet sayatsü asoshi sabang nüngdadaker, iba yongji Tsungremmong benjung mapang nung lanurtem sempet arangshitsü atema iba sentong ayongzük, ta metetdaktsü.
Iba sentong nung raliwalirtem densema lanur noklang aika denogo.
Tang sempet arangshir model temi local designer Merenla Mongka-i design asüba formal wear, Yinbeni Kikon-i design asüba ‘modern ethnic wear’ aser Asenla-i agütsüba accessories sayaa liasü.
Iba sentong ajunga ya Nagaland nung nüngtugu choreographer aser event organizer Adang Jamir-i choreographed asü.
Sentong nungsa taoba mapang Naga Idol contestants- Purkumkuk aser Liyang nati shilem agi, iba den külemi Mokokchung nungi tsüngsanger telok, The Hybrid Movement-i tsüngsanga lokti kanga jangratemdaktsüogo.
Iba sentong takok ngua agitetba atema sentong ayonger Temsu Kichu-i district ketdangsertem, police, shilem agirtem aser iba sentong nung adener ajak dang pelaba metetdaktsüogo.