Mokokchung nung U-19 volleyball coaching akar

Sports coach Talimoai Mokokchung nung U-19 pur volleyball coaching sentong ka nung shilem agirtem den jembidang tangokba noksa nung angur. Mokokchung, June 20, 2016.

Mokokchung, June 20 (TYO): ‘Volleyball for Peace’ Nagaland teloki ayongzüka Mokokchung nung Under 19 pur atema ‘volleyball coaching’ sentong ka Hombarnü nungi tenzüka yangi Imkongmeren Sports Complex nung kadaki. Iba coaching sentong tanü Mokokchung District Volleyball Association (MDVA) tir, Lakhi Longkumeri meraketa tenzüktsüogo.
Iba sentong nung Mokokchung town aser temeket nungi shilem agirtem longsoa arua dendar. Iba sentong nung tesayurtemji; Nagaland Sports Coach aser taoba Nagaland Volleyball team captain Talimoa den Lipokinba (Physical Instructor), Sentiyangba (Volleyball Instructor) aser Imsentoba (Senior Player) par pezü lir.
Tanü aNagaland nung lanur sempet aketer jenti lir, aji süaka, tim tesayuba (proper coaching) maliba ajanga asenoki tangar memeneper. Anungji, lanurtem nem tesayuba shitak agüja tarutsü nungbo national level tashi nung shilem agia takok ngutettsü nükjidong yur iba coaching ya ayongogo, ta iba osangbeneri Sports Coach Talimoa den jembidang pai ashi.
Asayar ka dak lidaktsünüba noklem (qualities) kar ashidang pai, mezüngbuba nung asayar ka dakji tazüokba alitsüla, iba den ano machimajemtsü nungi pilaa alitsü tim, libaliro ajungba den taremzük aser pei jakla azüoktettsüla, ta ashi.
Iba coaching ya July 2 tashi Imkongmeren Sports Complex nungsa alitsü sentong renema lir.