Mokokchung nung website ka lapok

Mokokchung Press Club tezülur, Wb. Sashimeren Jamir-i www.emokokchung.com website ka tenzüktsür külen website lapoksang Sp. Rongsenwati aser par külem medemertem külemi tangokba noksa nung angur. Mkg, 25th April, 2017

Mkg. April 25 (TYO): www.emokokchung.com ta sür website ka lapokogo. Iba website-ji Mokokchung Press Club (MPC) tongti zulur & senior reporter, Wb. Sashimeren Jamir ajanga tenzüktsü.
Iba website nung ya tongtibangsa Mokokchung town indang osang (information) tapu balala agütsütsü atema tenzükba lir.
Yangi Mokokchung town kübok ward-tem, riju balala, mozükitem, hotel & lodge, raliwalirtemi semdangba tesem (tourist spot), office balala, shishilembaba tesemtem aser osang balala aika angutsü, ta website lapoksang Longsa nunger lanur entrepreneur, Sp. Rongsenwatii metetdaktsü.
Jangratemtsükaji; iba site nung ya tezülur balalai züluba ocet (articles)-tem, sangro, e-book-tem, aser zülu tapu balala aika angutsü.
Tarutsü nung android phone nunga amshitettsüsa App aser Mokokchung nung tatalokba osangtsüsangtem agütsütsü tebilemba lir.
Iba website ajanga nüburtem nem mapang meindoki khen nung Mokokchung town indang temetettsü aika ngutettsü. Na kidang mener mesüra aenlen jajadanga iba site ajanga khen click asünung nai Mokokchung indang osang aika angutsü. Iba site nung arua nü tebilembatem ashitsü sabang lapoktsütsü aser iba site tajungba kümdaktsütsü atema nüburtemi shisatsü lemsateptsü akok.
Iba website tenzükba sentong tongmelang ka yangi Mokokchung Municipal Council Complex nung alidang, Sashimeren-i ashiba agi, taoba mapang Mokokchung nung website kar tenzükogo, aji saka, junga anepalu mesüteti samaba lir, anungji, iba website yabo maneni tajungba-tajungba küma bener aoba site ka südaktsütsü asoshi ajungshia liasü.
Iba yagi telok aika nem tajangzük agütsütsü imlar. Tongtibangsa bendanglen alir liso nisungtem asoshi iba website ya kanga tongtibang asütsü, kechiyong asen limai rongsen jenti indoka maruaka iba site ajanga Mokokchung indang temetettem karbo ngutettsü, ta Sashi Jamirisa ashi.
Rongsenwatiisa Mokokchung Municipal Council Shopping Complex Room No. 95 nungto 20-20 (the complete e-solution) ta sür dokan ka lapoka lir. Iba dokan-ji emokokchung indang office asütsü aser yangji akhi noksa tejentem tasen küma yanglutsür, internet browse sütettsü, game asayatettsü, Audio/Video, photo nungertem edit sütsür, certificate framing yanglutsür, computer & network services/solution aser tanga mapatem aika inyaker.
Iba website ya mezüng tenzüker asünung, advertisements aginürtem nem jenjang dalang yong agütsütsü. Anungji, tejangrar kar danga lira 8014232645/8732850299/9615833813 nung tongteprateptsü akok.