Mokokchung nung World Day Against Child Labour sentong agi

Dimapur, Aami 12 (TYO): District Child Protection Unit (DCPU) Mokokchung ajanga ‘Child labour: A Major Challenge’ onük nung ajemdaker Integrated Child Protection Scheme (ICPS) cum World Day Against Child Labour sentong ka Penli Community Hall, Mokokchung nung ayongzüka agi.
Iba sentong nung tongti o jembir ya Child Welfare Committee nung mendenpula, Dr. Imlirenla Walling liasü aser lai, tanurtem ya tarutsü putu lir, anungji parnok ya mapa tamajung ajunga nungi kümzüka ayutsüla, ta ashi.
“Tang asen tensa nung tanur ka taküm alitsü temeden, kümzüka ayuba, renlokdaktsüba aser shilem agitaktsüba ajunga agiena lir, anungji Child labour aser tanurtem merenshia amshiba anema raratsüla,” ta lai ashi.
Child’s Right Provision kümzüka ayutsü ya Integrated Child Protection Scheme kübok kanga tongtibang lir. Iba atema sorkar-ia memorandum of understanding (MoU) ka zülutepa lir, ta lai shisem.
Iba anogomung meteta aser nisung ajak nem kümdanga alitsü asoshi lenmang sayua, “Child labour is better than living in poverty” onük nung o intepba sentong ka ayongzüka agi. Iba debate nung ‘motion’ ya Queen Mary Higher Secondary School nungi liasü aser ‘against the motion’ ya Jubilee Memorial School nungi liasü.
Iba sentong ya OCPU nung Counsellor, Supongsangla-i ketdangsüa agi. Iba anogomung ratet ya DCPO, Moasenla Imchen-i agütsü aser LCPO, Sendonglemba-i tepela o jembi.