Mokokchung nung ‘World Music Day’ kanga longsoa mungogo

Mokokchung, June 21 (TYO): Mokokchung nung tang nüburtemi sapua tetshiba liso band den kija kentenertemi sabang agia Mokokchung nung June 21 nü ‘World Music Day’ sentong Cosmos Entertainment Hall nung kanga longsotepa mungogo. Iba sentong ya Mokokchung District Musicians Association (MDMA)-i ayongzükba liasü.
Shilem agir band rongnung; Tune Up Channel, Onus, Beyond Sunday, Mingle Tones, Flamboyant Souls, Mannequin, Rag Dolls, Galaxy Stars, The Great Decade, Trans Ebullient, Class of Music, 4 of Us, Yimjung Ola, Hunting Boots aser solo artist Lipokmenla, Imlisenla, Angangla, Longchameren, Arenla Lkr aser tangartemi sabang agia telok kanga longsodaktsü.
Tanü iba sentong nung tetushi tejaoker Mayangnokcha GHSS vice principal Lolenmayang-i MDMA-i adokba kensep ka sayatsü. WMD amungba den repsema ano MDMA-isa Junior Solo kenten tetoktepba sentong-a ka ayongzüka agiogo.
Music ajanga alima nung temelenshi jenti adokdaktsür, yimji-yimjung bener arutsür, telungjem adokdaktsür aser linük tsüngda apu latsür, ta tetushi tejaoker Mayang-i metetdaktsü.
Alima nung music telemsa aika lir, aji oda, tangar indang music ajizüka atembaji dang masü saka pei meyong ‘genre’ tasen tenzüktsüla, ta paisa ayongzüka liasü.
Taküm Junior Solo tetoktepba nung Kr. Anenla Jamir-i mezüngbuba jenjang angu aser tanabuba aser tasembuba jenjang nung Kr. Imlichila aser Kr. Sünepjungla Kichu na liasü.
Junior solo tetoktepba nung takoker angu shia nem Chord Music Store-i gift hampers renemtsü aser Resonate Studio-i recording contract agütsütsü, ta angazüker.