Mokokchung nung World No Tobacco Day among

Mokokchung, May 31 (TYO): Alima den liromedema Mokokchung jila nunga May 31, 2019 nü Mayangnokcha Government Higher Secondary School nung ‘Tobacco & Lung Health’ omen nung ajemdaker World no tobacco day mongogo, ta ketdangsertem osang ka ajanga metetdaktsü.
DPMU, CMO office sangdong ka ajanga, iba sentong nung tetushi tejaokerji Mokokchung ADC, Manpai Phom liasü, ta metetdaktsü.
Iba anogomong sentong nung jembidang pai, alima tesem ajungalen moko bulua achiba aser ibaji ajanga temang nung timtem agütsüba metetdaktsütsü nükjidong nung iba anogomong amonger, ta metetdaktsü.
Paisa, moko achiba ajanga alima nung küm shia nisung million 7 dak tema asür, aser iba nungji ‘second- hand smoke’ ajanga moko machirtema 890,000 asüba densema lir, ta metetdaktsü.
Paisa moko achiba ajanga temang nung timtem balala adokdaktsüba indang metetdaktsüba den külemi kaketshirtem dang moko tapu balala kecha machitsü ajungshia liasü.
Iba anogomong omen nung ajemdaker jembidang SMO, T.B and Chest disease Hospital, Mokokchung, Dr. Sunep-i, moko achiba ajanga tepokpok nung timtem agütsüba, cancer nungi tenzüka tangu sashiba tashidak adokdaktsüba aser ‘second-hand smoke exposure’ indang metetdaktsü.
Dr. Sunep-isa, moko machitsüla, kechiyong iba ya nija ka atema dang masü saka lokti rangben atema amokmeren lir, ta metetdaktsü.
Iba sentong ya Dr Chubala Aier CMO, Mokokchung leniba nung agi aser Dr. Kibangkumba Dy.CMO-i tepela anküp o jembia liasü.
Kasa sentong nung Imkongliba Memorial District Hospital Mokokchung nungi Student Nurse temi ken ka atenba den jilushi ka saya aser shilem agirtem nem IEC kaket lemja liasü.