Mokokchung nunga ‘alima tzü anogo’ amung

Mokokchung, March 22 (TYO): March 16 nungi tenzüka hopta piyong ‘National Rural Drinking Water and Sanitation awareness campaign’ agiyonga arur, tanü iba sentong tembangba den repsema ‘World Water Day’ sentong yangi Longkumer Kilem Mokokchung nung takok ngua liogo. Iba sentong ya Water and Sanitation Support Organization (WSSO)-i teyari agüja PHED Mokokchung-i ayongzük.
Tanü ‘World Water Day’ sentong nung tongti tesemdanger Mokokchung, SDO (C), Wt. T. Lemlila Sangtam-i jembidang, taküm nung tzü ya kanga tongtibang nüngdakba ka lir, anungji, tzüji asenoki meima amshiba den wazüka ayutsüla, ta metetdaktsü.
Department-i service agütsütsü kanga meranger, saka nüburtemi iba nungji amalitep melira sorkar sentongji kodanga takok mangutsü, anungji, yimtak watsan telok aser telok balalai iba khuretji metettsüla ta ashi. Talisa iba tsütsü lanurtem nem education jungjunga agütsütsüla aser iba jagi mapa tulu ka anungtsü imlar, ta laisa shisem.
‘Lokti ka yimsoshia aotsü asoshi merükmejuba ya mezüng mera lir, anungji, tanga district-tem dang tatishitsü tajung sayutsüsa asenoki mapa küma inyaktsüla aser iba nükjidongji aroki shilem agiba ajanga tongtettsü’, ta laisa ayongzüka liasü.
Shisalen sayur EE PHED, Mokokchung Er. N.Yanger Pongeni ‘Mokokchung district tzü jenjang’ onük dak ajemdaker jembidang, tang asenok libaliro amai dang ora Mokokchung nung küm 10 sülenbo tajemtsü tzü mangutsü, ta pai bushitetba kuli kar dena metetdaktsü.
Taoba küm 7-8 jakdang tzü anguba aser tang anguba na medemdangra, tang 25% shi dang angur, anungji, asenoki mapa kar yakta meinyakra ashiko taruba küm 10 sülenbo tzü mangutsü, ta paisa tekümdangtsü olen ka shiogo.
Paisa tzü menenba kuli kar ashidang, akhi yimya nung alu ayimba, tzü lalushiponga amshiba, mijang atuba ajanga tzü menenba, item ajakji nisungi yangluba mapatem lir, ta metetdaktsü.
‘Tarutsü putu atema asenoki tzü wazüka ayutsübaji kanga nüngdaker aser iba atemaji yimtak yimtsüng tashi oa iba shisatsü agütsütsüla’, ta paisa inyakdaktsünüba olen ka ashi.
Department-i nisung ka nem kenü nung tzü liter 40 bosa agütsütsü meranger, aji oda, Mokokchung district kübok yimtsüng 48 tashi nembo ibaji agütsüdaki, yimtsüng 76 nem nisung shia liter 40 magütsüteti lir aser yim ka nembo liter kata magütsüteti lir ta paisa kuli kar ashi.
‘Tang koba department-i akokba tashi maparen balala inyaka arudaki, iba nungji nüburtemi amaliteptsüla aser sorkar sentong angateta shilem agidaktsüner’, ta paisa ayongzüka liasü.
Tanü iba sentong nung Meren Imcheni ken ka aser Mokokchung Town Baptist Arogo (MTBA) lanurtemi jilushi ka ajanga tesentepertem saksalemdaktsü. Sentong nung yimtak yimtsüng nungi yimsüsür aser watsan committee züngsemtem aden. Kasa sentong nung telok ajaki shilem agia merükmejua alitsü tenangzükba ka agia liasü.
Alima tzü anogo ya 1993 nungi alima tesem balala nung mungyonga aruba osang ajanga angazüker.