Mokokchung nunga ‘World Music Day’ amungtsü

Mkg, June 20 : June 21 nü alima rangben nung ‘World Music Day’ agizüka amungba den külemi Mokokchung nunga WMD nüngtem Mokokchung District Musicians Association (MDMA)-i Mokokchung Cosmos Entertainment Hall nung kenten sentong tajung ka ayongzüka lir.
Iba sentong nung kentener balala shilem agiba den külemi ano MDMA Junior Solo Competition grand Finale-a alitsü aser osang tajung kaji MDMA züngsemtemi atenba kensep (album) ka dena sayatsü, ta MDMA tir Arsashi Ozükümi ashi.
Mokokchung nung nüngtugu band Tune Up Channel, Onus, Beyond Sunday, Mingle Tones, Flamboyant Souls, Mannequin, Rag Dolls, Galaxy Stars, The Great Decade, Trans Ebullient, Class of Music, 4 of Us, Yimjung Ola, Hunting Boots aser solo artist rongnung; Lipokmenla, Imlisenla, Angangla aser Longchameren nungertemi shilem agitsü ta angazüker.
Iba sentong ya angati dang sayutsü, anungji, music meimer ajak arua iba sentong nung shilem agitsü asoshi MDMA ketdangsürtemisa ayongzüka liasü.
Iba sentong ya nikongdang 3:00 ako shitak nungi tenzüktsü. MDMA ya Mokokchung nung music meimertem lungjemer district nung music luyimba ajungketba den sempet aketer lanurtem nem sabang lapoktsütsü nükjidong yur 2016 küm July 29 nü tentet.