Mokokchung PDA Rally osang

Lok Sabha Bye-Election atema PDA pur public rally ka yangi Imkongmeren Sports Complex, Mokokchung nung aliba mapang PDA candidate Tokheho Yepthomi den Nagaland Chief Minister Neiphiu Rio-i anir par külem tenzükertem aser party balala nung tongti ketdangsürtem tangokba noksa nung angur. Mokokchung, Monupii/May 16, 2018.

Mokokchung, Monupii 16 (TYO): Lok Sabha Bye-Election 2018 dak sendakba nung People’s Democratic Alliance (PDA) pur public rally sentong tulu ka yangi Imkongmeren Sports Complex Mokokchung nung ayongzüka liogo.
Iba sentong nung Nagaland Chief Minister Neiphiu Rio aser Deputy Chief Minister Y. Patton nati anir minister Imna Along Longkumer, minister Tongpang Ozüküm, minister G. Kaito, PDA candidate Tokheho Yepthomi, PDA Chairman & NDPP tir Chingwang Konyak, Nagaland BJP tir Visasolie Lhoungu, Adviser Imnatiba nungertemi tongti shilem agia jembi.
Tanü iba sentong nung Nagaland CM Neiphiu Rio-i jembidang, Tokheho ya politic nung takutet aser shisatsü aika aliba lenir ka dang masü saka pa ya grass root nungi atuba nübu tajung ka lir, anungji, pa ya Naga nunger asoshi tetemsü nübu ka asütsü imlar aser pa dak temulung lemteta PDA sorkari MP candidate shimer yoker, ta ashi.
Naga yimden tebilemtsü ya tekaratiba nung telatetba ka dangi arutsübaji PDA sorkar atema tongtibang teinyaktsü lir aser iba ya parnok mapang latettsü merangtsü, ta ashi. Naga solution den külemi ano state nung terenlok tapu balala inyaktsü PDA sorkari sentong renema akaba kar paisa lemsatep.
NPF MLA bo aika lir amai, saka parnok dak tashi mali, kechiba süra parnok tsüngda telok ana-asem tashi lemsaa lir, telok ka T.R Zeliang den aser telok ka Dr. Shurhozelie den aser tanga telok kabo parnok (PDA) sorkar nung denürtema lir, ta paisa ashi.
Paisa tesenteper dang PDA candidate Tokheho adoktsübaji dang masü saka vote aikati (margin aikati) agi koka PDA sorkar tashi itdaktsütsü asoshi tayongzükba ka agütsü.
PDA sorkari inyaktsü mapatong balala renema lir, anungji, item ajakji takok ngua ataloktsü asoshi telungjem nüngdaker aser nüburtemi sorkar den amalitepa nungittsü asoshi paisa mepishia metetdaktsü.
PDA Candidate Tokheho-ia mapang tatsüka agia jembidang, pai Naga nunger atema mapa kar inyaktsü temulungtetba yur iba election nung noktaker aser tongtibangsa Naga yimden tebilemtsü wadang indang ya temulung agüja inyaktsü, ta ashi. Paisa pa shimtetra maparen ajak nung PDA sorkar aser Naga nungeri aginüba ama inyaktsü, ta paisa shisem.
Iba sentong nung Mokokchung district kübok constituency 10 nungi PDA sorkar nung dena aliba party balala nungi nisung aika atenshia shilem agia aden.