Mokokchung SP-i metetdaktsür

Mokokchung, July 14 (TYO): Nüburtem kümzüka ayutsü tangatetba nung Mokokchung district kübok gari jajabatem aser traffic dak sentakba aibelen mapatem ajak kanga junga mita reprangtsü, ta tanü Mokokchung Superintendent of Police ajanga kümdanga alitsü osang ka metetdaktsüogo.
Anungji, gari anir ajaki Driving License den nüngdakba kaket itemi; registration certificate, insurance papers, fitness certificate (for transport vehicle)-tem bener jajatsü asoshi kasa sangdong nungsa mepishia metetdaktsü.
Gari kaket shitak malirtemji M.V Act under Sec. 177/181/196 nung aliba ama merenshitsü, aser gari kibur (owner or in-charge) kari danga memelaba nisung (unauthorized person)-tem nem gari anidaktsüba putetra Under Sec. 180 ajanga merenshitsü, ta Mokokchung SP-isa tekümdangtsü olen ka metetdaktsüogo.
Koba gari anidir aniaka, temesepba yi jemer manitsüla, kechiyong iba jaki tesama ajuruba dang masü saka aji ozüngi memelar. Iba nungji shirnoki aibelendir Sec. 185 M.V Act nung aliba ama merenshitsü.
Ano two wheeler anishirtem atema olen ka ashidang, tetsüng ana atenba talongtsü anirtemi teti Helmet semer dang anitsüla aser motor cycle nungji nisung ana dak tali anir mejajatsüla. Iba nung aibelenertemji; Sec. 177 M.V Act kübok merenshitsü.
Item tetuyubatem ya ozüngi melaba den nüburtem kümzüka ayutsü nükjidong nung inyaker, anungji, ajaki ozüng kübok senso tajung ka ama tashi anga amaliteptsü asoshi Mokokchung SP-isa mepishia metetdaktsü.