Mokokchung Sub-Divisional-tem CFR training akar

Miss Mokokchung Kr. Sünepmenla-i nisung yirur alidang anepaluba tasa ka sayuba noksa nung angur. Mokokchung, June 22, 2017.

Mokokchung, June 22 (TYO): June 19 nungi tenzüka Mokokchung district kübok sub-divisional tenet atema Community First Responder (CFR) yangi Mokokchung Town Hall nung kadar; Iba sentong ya Home Department kübok Nagaland State Disaster Management Authority-i nungita Home Guard, Civil Defence aser SDRF den külem sür District Disaster Management Authority Mokokchung-i ayongzüka akar.
Tanü Ongpangkong Block pur shilem agir parnok 28 nem iba kasa CFR training agütsüogo. Sentong nung shisalen sayurtemji; Miss Mokokchung & DDMA Mokokchung Brand Ambassador Kr. Sünepmenla Longkumtsür densema DDMA ketdangser den HG, CD, SDRF jawan aser district level CFR training agia alir TOT-tem lir.
“Ni anogo ishika iba training nung dena arudang tangazükba aika ngudar aser shilem agirtem nungi telangzüba tajung den parnok jangrabangra aser angazüknüba ngua kanga pelar,” ta Tir Yimyim osangbeneri Miss Mokokchung Kr. Sünepmenla den jembidang lai ashi.
“Iba ama training ya tanur-tain ajak asoshi kanga tongtibang lir aser ibai ajaki metettsü nüngdaker, anungji mapang shia iba amai ayongzüka akatsüla,” ta laisa ashi.
“Lendongtsüdong ya training agia alirtem dak dang ataloktsüba masü, anungji, training nung adenertemi nüburtem dang peii angazüka alibatemji lemsateptsüla,” ta laisa inyakdaktsünüba olen ka ashi.
Iba training ya “nübur atema nüngdakba ka lir”, ta yangji shilem agir kati iba osangbener den jembidang ashi. Iba training ya June 23 nü tembangtsü, ta angazüker.