Mokokchung town 125 inti benjong meraketa tenzükogo

Mokokchung town Quasquicentennial sentong nung Aor legislature par 11 nem tetushi agütsüba mapang tangokba noksa nung angur. Mokokchung, Dec. 12, 2015

Mokokchung, Dec. 12 (TYO): Nagaland Chief Minister T.R Zeliang-i Mokokchung town tenzüker küm 125 ajungba jubilee mung sentong Honibarnü yangi Imkongmeren Sports Complex Mokokchung nung meraketa tenzüktsüogo.
Tanü iba sentong nung Aor legislator 11 den Ao Sendeni anir Mokokchung town nung aliba kin balala nungi senso nübur aika adenshia longsotepa mungogo. Iba den ano kidanger district Tuensang, Wokha aser Zunheboto nungi yar tsüngsangertem arua shilem agiba ajanga tesentepertem kanga pelatepogo.
Tanü iba sentong nung CM T.R Zeliang-i, Mokokchung town 125 benjong tulu ka nung pa tongti tesemdanger jaokba asoshi tayonger aser nüburtem dang kanga pelar, ta ashi.
Mokokchung district ya lenla aika nung mezüngpur lir, item rongnung ajaki metetba kaji 3rd Naga People’s Convention (NPC) 1959 küm Dr. Imkongliba mendenbuba ser agibaji asütsü. Iba mapang lemtetba dak ajemdaker Naga yimten onük dak sentakba nung NPC lennirtem Delhi-i oa India sorkar nem memorandum agütsü aser iba ajanga 1960 nung India sorkar aser NPC na 16 Point Agreement sign asü. Yamaji tang aliba Nagaland state ya India union kübok 1963 küm züngok ta paisa ashi.
Mokokchung ya Nagaland nung tejentiba district headquarters rongnung tanabuba lir. Iba district ya terenlok aser yimsoshiba lenla aika nung mezüngpur lir. 1872 nung Dr. E.W Clark ajanga Ao lima Khristan yimsu den shisaliok mezüng bener arua Naga lima prokshi. Anungji, Aori tamaren mapa inyakba asoshi tanüngba Naga nunger Ao kin dang sentsüh tulu lir ta paisa ashi.
CM-isa yimten onük dak sentakba nung jembidang, mezüng NPC Tir Dr. Imkongliba Ao, mezüng Nagaland Chief Minister P.Shilu Ao aser state nungi yimsüsür mongin Dr. S.C Jamir ama lennirtem ya Mokokchung nungi sotetba lir ta paisa ashi.
Taoba küm Mokokchung ya regional party tamendakdak ka süa yangi nungi ‘United Democratic Front’ mapang assembly menden ajak nung takok angu. Yamaji tanüa NPF-i aniba DAN sorkar nung Mokokchung district nungi adoker yimsüsür ajak lir, ta paisa legislator ajak lungjema aliba asoshi nüburtem dang pelaba metetdaktsü.
Nagaland CM-isa Mokokchung town 125 ajungba nüngtem adokba nüngo kaket ka sayatsüba den quasquicentennial nüngshilung ka azüngtsüogo. Iba nüngshilung meshiteta Ao Baptist Arogo Mungdang (ABAM) executive secretary Rev. Dr. Mar Atsongchangeri sarasademtsü.
Tanü iba sentong nung Minister for NH, Mechanical & Elections Nüklutoshii tarurtem ajak pela agizük. Ao Senden tir Imolemba, Mokokchung town ali kibur nungi Pur Lkr, taoba Town Committee Chairman M.B Longkumer aser Mokokchung D.C Sushil Kumar Patel IAS nungertemia tayongzükba den tepela o tulu bener arua lemsatep. Mokokchung Town school tanurtem aser Fazl Ali College nung azüngertemi tsüngsang ken ajanga shilem agia liasü. Mokokchung town nung aliba senso/kin/ward balalai ‘March of Honor’ ta ser akhüm tetushi agütsüba mapang tajung ka agia liasü. Mokokchung Town Baptist Arogo pastor Rev. Ponen Longchar den temoatsü meshia sarasadem.
Dec 13 Deobarnü Mokokchung town nung aliba tamangba yimsü ajaki Mokokchung atema sarasadem balaka sütsütsü. Iba benjong ya Dec 17 tashi kasa Imkongmeren Sports Complex nung alitsü aser benjong mapang asayaba, chiyungtsü, yokshiyokra, shisatokden, fashion, dance competition aser kentenmenü tapu balala alitsü.